Në Gjirokastër do të rregullohen 30 banesa karakteristike me statusin monument kulturor, dëmtimet e të cilave janë konstatuar nga task-forca e ngritur nga Drejtoria e trashëgimisë kulturore dhe Bashkia e Gjirokastrës.
Pezana Rexha drejtoresha e trashëgimisë kulturore në këtë qytet tregon se po monitorohet gjendja e të gjitha shtëpive pranë kalasë dhe ngre dhe një shqetësim kur thotë se në Gjirokastër ka mungesë të theksuar arkitektësh dhe arkeologësh.
“30 banesa që kanë nevojë për ndërhyrje imediate në pjesën e çatisë. Ku është edhe problematika më e madhe. Pjesa më e vështirë është mirëmbajtja e tyre. Kjo është vetëm faza e parë.”
“Gjirokastra ka nevojë për arkitektë. Pa ta është e mbaruar.”
Në terren ndodhen dhe një grup të rinjsh që studiojnë për arkitekturë në Tiranë. Ata po bëjnë praktikën dhe po punojnë vullnetarisht për të konstatuar banesat e dëmtuara.” – thotë Rexha.
Monitorimi do të vazhdojë nga task-forca. Veç 30 banesave që kanë nevojë për ndërhyrje emergjente priten të restaurohen dhe të tjera.
