Të interesuar për të plotësuar mangësitë e krijuara nga mësimi në distancë, një pjesë e mirë e studentëve të Universitetit “Eqrem Çabej”, kanë filluar të bëhen pjesë e konsultimeve që tashmë janë organizuar përmes grafikëve të hartuar nga njësitë bazë të departamenteve. Nga kjo periudhë rikthimi kanë përfituar edhe ata që për arsye të ndryshme nuk u testuan online.
“Studioj për Kontabilitet-Financë. E pritëm me entusiazëm ardhjen në universitet pasi mësimi online nuk është efektiv. Shumë nga shokët e kursit janë paraqitur për të marrë leksione dhe kryer konsultime.” – shprehet një studente.
“Sot dhashë një provim, të cilin nuk munda ta jap online. Këtë periudhë përmes konsultimeve do të qartësohemi në ato çka nuk i kemi kuptuar” – thotë një tjetër studente.
Zv/rektori Jaho Canaj sqaron se rikthimi në auditorë është pritur mirë, nisur edhe nga fakti që studentët janë lodhur psikologjikisht gjatë kësaj periudhe të gjatë të zhvillimit të mësimit në distancë, i cili është shoqëruar edhe me problematika.
“Kur flasim për konsultime ata do të bëjnë edhe një përmbledhje të leksioneve. Në bazë të grafikut që janë hartuar nga njesitë bazë, studentët do të kenë mundësi të njihen me konceptet ligjet për secilën disiplinë të lëndëve që janë zhvilluar gjatë semestrit të dytë. Ndërkohë, do të vazhdojë dhe mësimi online. Ndërsa të gjitha provimet e sezonit të verës do të zhvillohen në auditorë. Studentët duket se janë të interesuar të kthehen në auditorë. Kjo vjen si rrjedhojë e një lodhjeje të madhe psikologjike, larg auditorëve, çka ka ndikuar në pritjen me entuziazëm nga ana e tyre për të qenë prezent. Nga masa e gjerë e studentëve ky lajm është pritur mirë dhe janë të interesuar. Janë përgatitur grafikët me qëllim që ata mos vijnë në mënyrë masive, por duke respektuar edhe masat. Jemi përballë një situate optimiste, ndërsa shpresojmë që viti i ardhshëm akademik të nisë në auditorë.” – sqaron zv/rektori Jaho Canaj.
Të gjitha provimet e sezonit të dytë, në Universitetin e Gjirokastrës, janë planifikuar për t’u zhvilluar në auditorë dhe do të jetë një sezon i tejzgjatur që do të shtrihet në 45 ditë. Është llogaritur që brenda muajit korrik ato të përfundojnë, për t’u lënë një muaj kohë pushime si studentetëve dhe stafit akademik.
