Gjykata e Posaçme kundër Korrupsionit dhe Krimit të Organizuar (GJKKO) ka dënuar avokatinBardhi Koçi për ushtrim të ndikimit të paligjshëm ndaj personave që ushtrojnë funksione publike, si dhe qytetaren Pranvera Meshi, e cila i kishte dhënë para për të ndikuar te një gjyqtar.
Bardhi Koçi u dënua fillimisht me 2 vite e 6 muaj burg, por për shkak të gjykimit të shkurtuar, dënimi iu ul në 1 vit e 8 muaj burg. Në përfundim, gjykata vendosi pezullimin e ekzekutimit të dënimit me burg dhe e la atë në shërbim prove për një periudhë prej 3 vitesh e 4 muajsh, me kusht që të mos kryejë asnjë vepër tjetër penale.
Po ashtu, gjykata vendosi t’i heqë Koçit të drejtën për të ushtruar profesionin e avokatit për një periudhë prej 3 vitesh, si dhe i hoqi masën e sigurisë “detyrim për t’u paraqitur në policinë gjyqësore”.
Ndërkohë, Pranvera Meshi u dënua me 1 vit burg, i cili pas gjykimit të shkurtuar u ul në 8 muaj burg. Edhe për të, gjykata vendosi pezullimin e dënimit me burg, duke e lënë në masë alternative dhe pa vuajtje dënimi në qeli.
Sipas SPAK, Bardhi Koçi ka kërkuar dhe ka përfituar para në disa raste, me qëllim ndërhyrjen në vendimmarrjen e funksionarëve të drejtësisë. Në një nga episodet, ai ka kërkuar 1,500 euro dhe ka përfituar 1,000 euro nga Pranvera Meshi, e cila ishte në proces gjyqësor në Gjykatën e Tiranës për falsifikim të dokumenteve shëndetësore, me synimin për të ndikuar në vendimin e gjyqtarit që shqyrtonte çështjen ndaj saj.
Discussion about this post