GJKKO e konfirmon: Ja kur do të vendosim mbi masën për Berishën

GJKKO ka konfirmuar dorëzimin e kërkesës së SPAK për ndryshimin e masës së sigurisë në “arrest shtëpie” për ish-kryeministrin Sali Berisha.

Po ashtu konfirmohet se seanca gjyqësore për shqyrtimin e kësaj kërkese do të zhvillohet më datë 26 dhjetor, ora 10:00.

Gjatë konferencës me gazetarët, ish-kryeministri reagoi në lidhje me këtë kërkesë, duke u shprehur se me burgje dhe me atentate nuk mposhtet kurrë opozita e një vendi.

Njoftimi

Prokuroria e Posaçme kundër Korrupsionit dhe Krimit të Organizuar më datë 22.12.2023 ka paraqitur pranë Gjykatës kërkesën me objekt: Zëvendësimin e masës së sigurimit personal për personin nën hetim Sali Berisha, si i dyshuar për figurën e veprës penale “Korrupsion pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, parashikuar nga neni 260 e 25 i Kodit Penal.

Bazuar në nenin 260 pika 4 të K.Pr.Penale, seanca gjyqësore për shqyrtimin e kësaj kërkese do të zhvillohet më datë 26.12.2023 ora 10:00.

Tiranë, më datë 22.12.2023

Gjykata e Posaçme e Shkallës së Parë për Korrupsionin dhe Krimin e Organizuar