GJKKO ka lënë në fuqi masën e arrestit me burg për ish-shefin e Komisariatit të Kurbinit, Dritan Metaj, i arrestuar një ditë më parë në kuadër të operacionit të koduar “Flakë në det”, të nisur që në muajin gusht.
Para GJKKO, Metaj ka pohuar takimet e Gëzim Çelën i njohur edhe si “kumbari i drogës”, ndërsa është dënuar nga drejtësia shqiptare me 20 vjet heqje lirie.
Sipas tij, këto takime kanë qenë pasi kanë pasur njohje të mëparshme.
“Kam bërë gabim, po e kam bërë, pasi e njihja më herët dhe nuk e shmangia dot takimin”, tha ai.
Ish-shefi i policisë së Kurbinit Dritan Metaj, dyshohet se ishte pjesë e bandës së trafikut të drogës nga Shqipëria në drejtim të Italisë, duke ndihmuar narkotrafikantin e shpallur në kërkim Gëzim Çela.
Metaj dyshohet se kryente rolin e transportuesit të anëtarëve të grupit kriminal, duke shfrytëzuar postin e tij si komisar policie për të shmangur kontrollet e uniformave blu.
Implikimi i Metajt në këtë grup kriminal u zbulua pasi në gusht u arrestuan 4 shqiptarë dhe dy ukrainas që po përpiqeshin të bënin një shkëmbim droge në det.
Nga telefonat e të arrestuarve, pas çkodimit të tyre, janë zbuluar bisedat mes Dritan Metajt dhe të arrestuarve. Më pas, sipas raportimeve, për disa javë ndaj ish-shefit të Komisariatit janë thelluar hetimet, madje duke e vendosur nën përgjim, çka ka siguruar provat për lidhjet e tij me grupin kriminal, përfshi këtu edhe të shumëmërkuarin Çela.
Dritan Metaj është emëruar në krye të komisariatit të Kurbinit më mars të 2023, pra disa muaj përpara se të arrestohej. Më parë ai ka mbajtur edhe detyrën e shefit të Komisariatit të Kukësit.
Në kuadër të operacionit Flakë në det u shpallën gjithashtu në kërkim dhe shtetasit , Arben Dalipaj dhe Roland Guzo.
Discussion about this post