Gjykata e Posaçme e Shkallës së Parë per Korrupsionin dhe Krimin e Organizuar i ka dërguar nëpërmjet shërbimit postar njoftimin ish-kryeministrit Sali Berisha, si person në hetim. Sipas GJKKO, njoftimi i është dërguar z. Berisha në adresën e banesës, Kuvendin e Shqipërisë dhe pranë selisë së PD.
Raportohet se GJKKO ka dërguar në adresën e z. Berisha deftesat e komunikimit për njoftimin e tij si person nën hetim, si dhe dëftesat e komunikimit edhe avokatëve mbrojtës, përfaqësues të tij me prokurë të posaçme.
Njoftimi është kthyer me nënshkrimin ‘Refuzuar’.
Ndaj zotit Berisha ka nisur hetimi nga SPAK lidhur me procedurat për privatizimin e ish-kompleksit Partizani. Për të njëjtën çështje, Jamarbër Malltezi, dhëndri i ish-Kryeministrit, ndodhet në qeli me akuzën e korrupsionit të kryer në bashkëpunim dhe pastrim parash.
Gjithashtu nën hetim ndodhet edhe ndërtuesi Fatmir Bektashi. Ky i fundit ka të njëjtën masë si ish-Ktyeministri Sali Berisha, detyrim paraqitje dhe ndalim udhëtimesh jashtë vendit. E ndërsa Berisha nuk u paraqit të hënën e parë të muajit nëntor para OPGJ, Bektashi është paraqitur në SPAK por nuk ka dhënën asnjë koment për mediat.
Njoftimi i GJKKO:
Gjykata e Posaçme e Shkallës së Parë per Korrupsionin dhe Krimin e Organizuar ka dërguar nëpërmjet shërbimit postar deftesat e komunikimit për njoftimin e personit nën hetim z. S. B. pranë selisë së PD-së dhe në adresën e shtëpisë, pranë Kuvendit të Shqipërisë. Njoftimi është kthyer me nënshkrimin ‘Refuzuar’.
Gjithashtu u dërguan dëftesat e komunikimit edhe avokatëve mbrojtës, përfaqësues të tij me prokurë të posaçme.
Discussion about this post