Media greke i ka kushtuar një artikull vendimin të Gjykatës së Posaçme të Apelit, e cila rrëzoi kërkesën e Fredi Belerit, kryebashkiakut të zgjedhur të Himarës, për tu liruar nga burgu. Beleri u arrestua dy ditë para zgjedhjeve të 14 majit me akuzën e shit-blerjes së votave, ndërsa për ditë me rradhë u vendos në qendër të sulmeve personale nga Kryeministri Edi Rama.
“Gjykata e Posaçme e Apelit në Tiranë ka rrëzuar edhe një herë kërkesat për lirimin nga burgu të Fredi Belerit dhe të drejtën e tij për të ushtruar detyrën e kryetarit të bashkisë.
Beleri është arrestuar që prej muajit maj për blerje të dyshuar votash, pasi u zgjodh kryetar i qytetit të Himarës në Shqipëri me shumicë etnike greke.
Pas shpalljes së vendimit të hënën, presidenti i Avokatëve Evropianë pa Kufij, Patrick Henry dhe kryetari i Dhomave Plenare të Avokatëve të Greqisë, Dimitris Vervesos mbajtën një konferencë për shtyp.
Patrick Henry vuri në dukje se me vendimin për mohimin e lirimit të Belerit, gjykatat shqiptare shkelën nenet 5 dhe 10 të Konventës Evropiane për të Drejtat e Njeriut.
Ai shtoi se nuk ka motive që Fredi Beleri të largohet nga vendi, ndërsa në të njëjtën kohë mund të merren masa të sigurta për të parandaluar arratisjen e tij.
Ai e konsideroi burgun në disproporcion me krimin e Belerit, pasi ka mbi 30 persona të akuzuar për vepra elektorale që nuk mbahen në paraburgim.
Dimitris Vervesos iu referua shkeljes së nenit 3 të Konventës Evropiane për të Drejtat e Njeriut, i cili e konsideron të paligjshme pengimin e një zyrtari në kryerjen e detyrës në mungesë të një vendimi gjyqësor të formës së prerë dhe të parevokueshme”, shkruan media greke.
Discussion about this post