Gjykata e Posaçme kaloi në gjykim dosjen në ngarkim të kryebashkiakut të Rrogozhinës, Edison Memolla dhe 5 personave të tjerë, të akuzuar si të përfshirë në korrupsion në zgjedhje.
Çështja pritet të kalojë me gjykim të zakonshëm, pasi asnjë nga të pandehurit nuk kërkoj të përfitojë nga procedura e shkurtuar.
SPAK thotë se Memolla, ndërhyri në mënyrë që të mos i pritej furnizimi me energji elektrike një familje para zgjedhjeve lokale, teksa u regjistrua audio kur fliste me punonjësin e OSHEE.
Nga ana tjetër, Prokuroria e Posaçme njoftoi se përfundoi hetimet për kryebashkiakun e Kuçovës, Kreshnik Hajdari, dhe ka dorëzuar në Gjykatë kërkesën për ta marrë atë të pandehur.
Ai akuzohet për falsifikim të formularëve të dekriminalizimit, pasi referuar hetimeve nuk ka deklaruar në dy raste një dënim në shtetin grek. SPAK thotë se autoritetet greke kanë konfirmuar se Hajdari është dënuar me masë riedukuese nga Gjykata Janinës për kalim të paligjshëm të kufirit.
Hajdari ka mohuar më herët akuzat duke pretenduar se nuk ka dijeni.
Discussion about this post