Gjykata Kundër Krimit dhe Korrupsionit të Organizuar ka dënuar me 10 vite burg Moisi Habilajn.
Në vendimin e GJKKO, Habialj është shpallur fajtor për veprat penale “trafikim i lëndëve narkotike e mbetur në tentativë e kryer në formën e grupit të strukturuar kriminal, për të cilën është dënuar me 12 vite burg, si dhe grup të strukturuar kriminal, ku është dënuar me 4 vite.
Me uljen e dënimit sipas kodit të procedurës penale, Habilaj është dënuar përfundimisht me 10 vite burg. Fajtorë janë shpallur edhe Nazer Seiti, Maridian Sulaj dhe Fatmir Minaj, të cilët me uljen e dënimit janë dënuar përfundimisht me nga 9 vite burg.
Moisi Habilaj u dënua qershorin e kaluar me akuzën e trafikut të drogës nga Shqipëria në Itali, ndërsa pak muaj më parë Apeli e la në fuqi. Grupi kryente trafikun e drogës kryesisht nga deti me anë të peshkarexhave. Kur mbërrinte në Itali droga i shitej disa klaneve mafioze në provincat e Katanias, Sirakuzës dhe Raguzës. Habilaj është përfolur për lidhje farefisnore me ish-ministrin e Brendshëm Saimir Tahiri.
Vendimet
Moisi Habilaj- 10 vite burg
Nazer Seiti- 9 vite burg
Maridian Sulaj- 9 vite burg
Fatmir Minaj- 9 vite burg
