Gjykata e Posaçme e Apelit për Krimin dhe Korrupsionin ka pranuar kërkesën e SPAK për caktimin e masës “arrest me burg” për ish-deputetin socialist Alqi Bllakon, duke pritur në çdo moment arrestimin e tij.
Kjo lëvizje e SPAK vjen vetëm një ditë pasi Bllako dorëzoi mandatin e deputetit pranë Kuvendit duke zgjedhur të mos mbrohet para Këshillit të Mandateve por të gjykohet si qytetar i thjeshtë.
Bllako, akuzohet për “Shpërdorim të detyrës” në bashkëpunim dhe “Korrupsion pasiv i funksionarëve të lartë shtetërorë”. Sipas Prokurorisë së posaçme ai, në bashkëpunim me ish Ministrin e Mjedisit Lefter Koka dhe një tjetër zyrtar të Ministrisë, ku ai ka patur detyrën e Sekretarit të Përgjithshëm, kanë përgatitur dokumentacion të falsifikuar në lidhje me të dhënat e pronës së shpronësuar, për ndërtimin e inceneratorit të Fierit, duke ndryshuar cilësimin nga “arë” në “tokë truall”, duke rritur vlerën e shpronësimit.
Po ashtu ai dyshohet se ka favorizuar shoqërinë përfituese të koncensionit, në këmbim “të përfitimeve të parregullta” me një vlerë prej afro 150 mijë dollarë, të cilat kanë shkuar në formën e pagesave të larta mujore për babanë e tij, i punësuar pranë inceneratorit të Tiranës.
Discussion about this post