GJKKO rrëzon Berishën për Irena Gjokën

Gjyqtarja Flora Hajredini ka rrëzuar kërkesën e paraqitur nga avokatët e ish-Kryeministrit Sali Berisha, për përjashtimin e gjyqtares Irena Gjoka.

Kjo e fundit ka caktuar masat e sigurisë ndaj ish-Kryeministrit Berisha, dhëndrit të tij Jamarbër Malltezi, i cili ndodhet në burg, dhe ndërtuesit Fatmir Bektashi, lidhur me hetimin që është kryer nga SPAK për privatizimin e kompleksit Partizani.

Avokatët e ish-Kryeministrit Berisha depozituan në GJKKO kërkesën për përjashtimin e gjyqtares Gjoka, pasi sipas tyre, kishte shkelur Kushtetutën, duke miratuar kërkesën e SPAK për caktimin e masave të sigurisë ndaj deputetit, duke mos marrë më parë autorizim nga Kuvendi.

Berisha më herët, gjatë një konference për mediat, tha se kishte kërkuar përjashtimin e gjyqtares me argumentin se ajo kishte shkruar Kushtetutën në zyrën e saj, gjë të cilën e konsideroi të papranueshme.

Tashmë që gjyqtarja e gatshme Flora Hajredini ka rrëzuar kërkesën e Berishës, gjyqtarja Irena Gjoka, e cila është gjithashtu edhe kryetare e GJKKO, mund të vijojë procesin për rivlerësimin e masave të sigurisë ndaj ish-Kryeministrit.