GJKKO ka rrëzuar kërkesën e avokatëve mbrojtës të ish-Kryeministrit Sali Berisha. Genc Gjokutaj, njëri prej avokatëve të Berishës, tha se kishte kërkuar largimin e gjyqtares Irena Gjoka, por kjo kërkesë ishte rrëzuar.
Gjithashtu GJKKO ka rrëzuar kërkesën për shuarjen e dy masave të sigurisë ndaj ish-Kryeministrit, “detyrim paraqitje” dhe “ndalim të daljes jashtë vendit”.
Gjokutaj tha se vendimet e marra ndaj z. Berisha janë të paekzekutuara në sekretari.
“Ne kërkuam përjashtimin e gjyqtares, e dyta kërkesë. Një reagim krejt i ftohtë dhe një vendimmarrje si të gjitha të tjerat. Sigurisht kjo seancë ia vlejti për të dokumentuar shkeljen e radhës së gjykatës. Vendimi i zbardhur na u dha sot.
Imagjinoni që vendimet janë të pa ekzekutuara, vendimet janë të pa depozituara në sekretarinë e gjykatës.
Ndërkohë që Gjykata dhe Prokuroria flisnin sikur ato vendime janë komunikuar. Ne e konsiderojmë të pa ekzekutuar atë vendim, pavarësisht se këta i qëndrojnë shkeljes.
Një gjykatë dhe një prokurori që shkel Kushtetutën, Kodin e Procedurës Penale e ka në dorë të dytë. Të dyja kërkesat janë rrëzuar”, tha avokati.
Më herët Gjokutaj ka deklaruar se gjyqtarja Irena Gjoka është në konflikt të pastër interesi me rastin e ish-Kryeministrit Sali Berisha, pasi në kohën kur ky i fundit ishte President Republike dhe drejtonte KLD-në, gjyqtarja Gjoka ishte shkarkuar nga detyra për korrupsion.
Discussion about this post