Gjykata e Posaçme e Apelit ka refuzuar sërish kërkesën e gjyqtares së Krujës Enklejda Hoxha për zbutje të masës së sigurisë duke e lënë në burg. Hoxha akuzohet për korrupsion ndërsa theksojmë se është hera e 8 që ajo depoziton kërkesën për ndryshim të masës në Gjykatë ku kjo e fundit ka lënë të pandryshuar vendimin e parë atë të “arrest me burg”.
Hetimi
Kujtojme qe disa dite me pare SPAK ka dorëzuar në Gjykatën e Posaçme dosjen hetimore të ish-gjykatëses së Krujës, Enkelejda Hoxha. Përveç saj, të përfshirë në këtë çështje janë edhe shtatë persona të tjerë, të cilët akuzohen për korrupsion dhe ushtrim të ndikimit ndaj personave që ushtrojnë funksione publike. Të pandehurit e dërguar në GJKKO janë ish-gjyqtarja e Krujës, Enkelejda Hoxha, sekretarja e Gjykatës së Krujës, Manuela Mallkuçi dhe avokati Aldo Tabaku, të akuzuar për korrupsion pasiv dhe 5 persona të tjerë, që përdorën paratë për të ndikuar në ndryshimin e masës së sigurisë. Sipas njoftimit të bërë nga Prokuroria e Posaçme Kundër Korrupsionit dhe Krimit të Organizuar, kjo prokurori ka marrë të pandehur dhe ka dërguar për gjykim të pandehurit Enkelejda Hoxhën, pasi është akuzuar se ka kryer veprën penale “Korrupsion pasiv i gjyqtarëve, prokurorëve dhe funksionarëve të tjerë të drejtësisë, kryer në bashkëpunim. Siç u përmend dhe më sipër, është çuar në gjykim dhe avokati Aldo Tabaku, me akuzën se ka kryer veprat penale “Korrupsion pasiv i gjyqtarëve, prokurorëve dhe funksionarëve të tjerë të drejtësisë”, kryer në bashkëpunim dhe gjithashtu, “Ushtrimi i ndikimit të paligjshëm ndaj personave që ushtrojnë funksione publike”. Manuela Mallkuçi e cila kishte rolin e sekretares së Gjykatë së Krujës, tanimë do të dalë për gjykim para GJKKO-së si e akuzuar për veprat penale “Korrupsion pasiv i gjyqtarëve, prokurorëve dhe funksionarëve të tjerë të drejtësisë” dhe “Korrupsion aktiv i personave që ushtrojnë funksione publike”. Duke u bazuar gjithmonë te njoftimi për shtyp dhënë nga Prokuroria e Posaçme, pesë personat e tjerë të përfshirë, të cilët gjithashtu do të dërgohen për gjykim janë Bledar Petani, Sajmir Petani, Altin Skëndaj, Gazmir Nezaj dhe Gentjan Nezaj. Për katër të pandehurit e parë, rëndon akuza e veprës penale “Korrupsioni aktiv i gjyqtarit, prokurorit dhe funksionarëve të tjerë të drejtësisë”. Ndërsa, Gentjan Nezaj është i akuzuari për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”.
