GJKKO shtyn pas një jave mbrojtjen e Erion Veliajt, Ajola Xoxes dhe Shkëlqim Fushës

Do të duhet të pritet 12 dhjetori, për një vendimmarrje të mundshme mbi dosjen “Veliaj”, nëse Gjykata e Posaçme do e kalojë për gjykim, do ia rikthejë SPAK-ut për plotësim, apo do e pushojë.

Para gjyqtares Etleva Dedja përfundoi mbrojtjen ish-deputetja socialiste Klotilda Bushka. Ajo nuk ishte e pranishme në seancë, por përmes avokatit të saj kërkoi pushimin e çështjes, me argumentin se fakti i pretenduar nuk parashikohet nga ligji si vepër penale. Në rast se kjo kërkesë nuk pranohet, mbrojtja e ish-deputetes, kërkoi gjykimi i shkurtuar dhe moskopetencë të GJKKO për shkak se nuk është më deputete, pra kalim të çështjes ne gjykatën e zakonshme. Ish-deputetja akuzohet nga SPAK se ka ndërhyrë për të penguar hetimet duke intimiduar dëshmitarë.

Në seancë u paraqit vetëm biznesmeni Elman Abule. Ai ishte i pari që paraqiti mbrojtjen në seancat e mëparshme ku kërkoi pushimin e çështjes ose në alternativë gjykim të shkurtuar. Mbrojtja përfundoi këtë të premte edhe nga avokatet e 2 shoqërive, “Byla”, dhe “Eventus”. SPAK përfaqësohej nga dy prokurorët  Altin Dumani dhe Olsi Dado të cilët kërkojnë dërgim të çështjes për gjykim.

Në seancën e ardhshme pas 1 jave, pritet të shpalosen argumentet e mbrojtjes së kryebashkiakut të Tiarnës, Erion Veliaj, bashkëshortes së tij Ajola Xoxa dhe 2 prej biznesmenëve të akuzuar, Gentjan Sula e Shkëlqim Fusha dhe shoqërive.

Në seancën e kaluar paraprake ku Veliaj për herë të parë ishte vetë i pranishëm, kërkoi të mos vendosej në kafaz në sallën e gjyqit, por krah avokatit. Kërkesa u rrëzua në sallë nga gjyqtarja me argumentin se s’e parashikon ligji. Kryebashkiku ka kërkuar gjithashtu një kopje fizike të dosjes 60 mijë faqe, dhe ka kërkuar gjithashtu kohë të njihet me aktet ndaj tij.

Veliaj ndodhet në paraburgim prej shkurtit të këtij viti dhe akuzohet për pastrim parash, mosdeklarim pasurie, korrupsion pasiv në 9 episode, shpërdorim detyre si dhe futje të sendeve të ndaluara në qeli. Kryebashkiaku Veliaj i lënë në detyrë me vendim të Gjykatës Kushtetuese, i ka mohuar akuzat dhe e ka quajtur procesin të pabazuar në prova.

gijotina.com/