Autoriteti i Konkurrencës ka gjobitur gjashtë ndërmarrje grumbulluese për bashkërendim të çmimeve në dëm të fermerëve në qarqet Tiranë, Elbasan, Berat, Fier dhe Korçë.
Pas një hetimi që zgjati gati dy vite dhe përfshiu disa qarqe të vendit, Komisioni i Konkurrencës konstatoi praktika të ndaluara që kishin shtrembëruar konkurrencën, kishin diktuar çmimet e blerjes si dhe kishin rënduar pozitat negociuese të fermerëve.
“Në mbledhjen e datës 26.11.2025, Komisioni i Konkurrencës miratoi vendimet nr. 1234–1239, me të cilat konstatoi se një grup ndërmarrjesh grumbulluese – Omer Fruit SHPK, Nedrete Arapi PF, Besim Thaqi PF, Morina Grup SHPK, Fruit-To-Zela SHPK dhe Roland-2012 SHPK – kanë bashkërenduar çmimet e blerjes gjatë periudhave të sezonit, duke diktuar çmimet në dëm të fermerëve dhe duke aplikuar mark-up (shtesë mbi kosto) shumë të lartë, deri në 115%.
Kjo sjellje e bashkërenduar përbën marrëveshje të ndaluar sipas nenit 4 të ligjit nr.9121/2003 dhe është cilësuar si shkelje e rëndë, për të cilën Komisioni ka vendosur gjoba deri në 0.15% të xhiros së vitit financiar paraardhës.”- thuhet në njoftim.
Hetimi i thelluar tregoi se disa grumbullues, falë fuqisë së tyre negociuese, kishin krijuar një situatë ku fermerët shpesh përballeshin me:
- çmime të diktuara e të koordinuara,
- dyer të mbyllura për negocim,
- varësi të tepruar nga pak blerës,
- presione për uljen e çmimeve,
- dhe shlyerje të vonuara të pagesave.
Komisioni ka urdhëruar ndërmarrjet e gjobitura që:
- të afishojnë në mënyrë të dukshme çmimet aktuale të produkteve që grumbullojnë,
- të jenë subjekt monitorimi për 1 vit nga Autoriteti i Konkurrencës.
Me vendimin nr. 1240, Komisioni i Konkurrencës ka adresuar institucionet përgjegjëse me rekomandime të rëndësishme për reformimin e tregut, përfshirë:
-minimizimin e informalitetit në gjithë zinxhirin e tregtimit,
-hartimin e një baze të re ligjore në përputhje me standardet e BE,
-krijimin e një platforme kombëtare online të çmimeve (bursë agro-ushqimore),
-vendosjen e kontratave të detyrueshme dhe të standardizuara,
-dhe bashkëpunimin për transpozimin e Direktivës së BE për praktikat tregtare të padrejta (UTP).
Discussion about this post