Shkelën perimetrin e sigurisë në det, bllokohen 2 Jet Ski në Sarandë

Shërbimet e Policisë Kufitare kanë evidentuar dy raste të shkeljes së perimetrit të sigurisë detare në zonat bregdetare të Sarandës dhe Ksamilit.

Rasti i parë u konstatua në zonën detare të Sarandës, ku një mjet lundrues tip Jet Ski kishte hyrë brenda perimetrit të sigurisë, në një hapësirë të frekuentuar nga pushuesit, duke rrezikuar sigurinë e tyre.

Një tjetër shkelje u evidentua në zonën e Ksamilit, ku një Jet Ski tjetër kishte hyrë në zonën e ndaluar për lundrim pranë plazhit, në kundërshtim me rregullat e përcaktuara për sigurinë në det.

Në të dy rastet, mjetet lundruese u bllokuan nga shërbimet e Policisë dhe u shoqëruan në Portin e Sarandës.

Ndaj drejtuesve të mjeteve, shtetasve me iniciale R. A. dhe R. P., u morën masa administrative me gjobë prej 500.000 lekësh të rinj secili, për shkeljen e rregullave të lundrimit dhe cenimin e sigurisë së pushuesve.