Ernest Gjoka është shumë pranë rikthimit si trajner në Kategorinë Superiore, pas 4 vitesh mungesë. Tekniku i njohur kryeqytetas, pritet që shumë shpejt të zyrtarizohet në pankinën e klubit shijakas të Erzenit.
Klubi është ndër të fundit që ka nisur punën për sezonin e ri dhe gjithçka fillon pikërisht me timonierin e ri, pasi e mbylli edicionin e kaluar me Alfered Deliallisin në pankinë, ndihmësin e trajnerit Xhevahir Kapllani, të shkarkuar vetëm pak javë para mbylljes së kampionatit.
Mësohet se trajneri një herë kampion i Shqipërisë, me Kukësin, është në kontakte me klubin prej kohësh dhe palët kanë gjetur akordin për të bashkëpunuar për këtë edicion, ku objektivi primar mbetet përsëri mbijetesa në elitë.
Gjoka ka drejtuar në vendin tonë klubet e Apolonisë, Kamzës, Tomorit, Flamurtarit, Kukësit dhe Vllaznisë, teksa është ulur edhe në pankinën e Shkëndijës së Tetovës në Maqedoninë e Veriut dhe të Ohod në Arabinë Saudite.
Në karrierën e tij ai ka fituar titullin kampion në Kategorinë Superiore me Kukësin dhe atë në Maqedoninë e Veriut me Shkëndijën.
Discussion about this post