Avokati Genc Gjokutaj nga studion e News24 tha se ish-zv.Kryeministri Arben Ahmetaj nuk ndodhet në Britaninë e Madhe, sikundër pretendojnë avokatët e tij, por në Katar.
Gjokutaj tha se ka informacione të besueshme lidhur me vendndodhjen e Ahmetajt, ndërsa kritikoi SPAK për veprime të ngadalta.
“Hotelet apo qerasjet ishin çelësi që hapën Kutinë e Pandorës, por është tronditëse mënyra se si janë trajtuar paratë publike, apo se çfarë produkti ka prodhuar. Kjo është ulëritëse, SPAK e ka në dorë, por ka ecur me shpejtësi si të kërmillit për çështjen e inceneratorëve”, tha ai.
Në vijim avokati Gjokutaj tha se ndërsa GJKKO jep vendim për kontrolle banesash, nuk nxjerr vendim nëse duhet arretuar ose jo ish-zv.Kryeministri, pas autorizimit që Kuvendi i dha SPAK-ut.
“Përse gjykata ka dhënë leje për kontrollin e banesave, por nuk ka dhënë vendim në lidhje me arrestimin e Arben Ahmetajt?
Kërkimi kombëtar apo ndërkombëtar fillon pasi vendimi të jetë marrë me akt të shkruar. Mendoj që SPAK nuk e ka dorëzuar kërkesën, por mbetet për t’u parë.
Disa thonë është në Angli, por nga burime tepër të besueshme thonë se ndodhet në Katar. Avokatët janë në funksion të tij. Ai preu edhe një biletë avioni për në Itali dhe nuk e përdori. Emiratet e Bashkuara Arabe, Katari janë bërë strehë të krimit”, u shpreh Gjokutaj.
“A e ka të sigurt Ahmetaj që në Angli do ti miratohet kërkesa për azil? Por në shtete të tilla si Emiratet e Bashkuara Arabe, qëndrimin atje e ka më të sigurt se sa në Mbretërinë e Bashkuar”, shtoi më tej.
Discussion about this post