Këngëtari i njohur shqiptar, Gjon Muharremaj, ose siç njihet edhe me emrin e artit Gjon’s Tears, ishte mbrëmjen e djeshme në eventin muzikor “MTV Europe Music Awards 2021”, ku fitoi çmimin “Performuesi më i mirë zviceran”.
Lajmin e ka bërë të ditur vetë këngëtari, i cili me anë të një postimi në Instagram, është shprehur i lumtur për fitoren duke falënderuar të gjithë njerëzit që e mbështetën.
“Performuesi më i mirë zviceran! Ne ja dolëm, faleminderit të gjithë njerëzve të mi dhe fansave që votuan për mua. Pa juve, do të kisha qëndruar në shtëpi kështu që faleminderit për të gjitha. Faleminderit njerëzve që më mbështesin çdo ditë: Prindërve të mi, vëllait, gjyshit dhe grupit tim. Më keni bërë shumë të lumtur sot”, ka shkruar ndër tjera Gjon.
Kujtojmë që në këtë kategori ai ka garuar përkrah artistes tjetër shqiptare, reperes Loredana. Ndërsa, nominimet në këtë ceremoni i udhëhoqi Justin Bieber, me gjithsej tetë të tilla.
Ndërkohë, në mesin e shumë yjeve që shkëlqyen në tapetin e kuq të MTV EMA ishte dhe këngëtarja shqiptare me famë botërore, Rita Ora.
Discussion about this post