Detaje të reja janë zbardhur nga ngjarja në Nikël, ku u dhunua dhe grabit biznesmeni Nazmi Çangu.
Nga burimet bëhet me dije se dyshohet për më tepër se 5 persona të cilët kanë marrë pjesë në grabitje, ku njëri prej tyre ka qenë i pamaskuar. Ata kanë hyrë nga pjesa e pasme e makinës, ku njëri prej autorëve ka ruajtur veprimet e fundit të Çangut, duke survejuar dhe automjetin e tij.
Sapo kanë hyrë në banesë, grabitësit kanë mbyllur në një dhomë vajzën, bashkëshorten e biznesmenit dhe një të afërm të tyre. Pavarësisht se sipas deklaratës së vajzës, ajo ka pranuar se e ka parë fytyrën e njërit prej grabitësve, sërish nuk ka mundur të japë detaje rreth tij.
Një tjetër detaj është një kapele e gjetur në ullishtën pranë banesës, e cila pritet t’i vijë në ndihmë grupit hetimor. Çangu është përmendur në një proces tjetër të çështjes Shullazi. Ai është pyetur dhe për këtë të fundit dhe ka këmbëngulur se nuk ka konflikt me Shullazin.
Disa gjurmë gjaku të gjetura në banesë, janë prova të rëndësishme në zbardhjen e ngjarjes, pasi biznesmeni ka kafshuar në dorë njërin prej grabitësve. Dyshimet janë se gjaku të jetë i tij, ku më pas do të çojë në identifikim. Me zbulimin e njërit prej autorëve, do të ishte shumë më e lehtë për të identifikuar të gjithë grupin.
Makina e përdorur nga grupi i grabitësve është e vjedhur nga një rezort në kryeqytet.
Çangu jepte para me fajde e kjo është njëra prej arsyeve për të cilat dyshohet se ka ndodhur ngjarja. Megjithatë, biznesmeni nuk ka pranuar të ketë konflikte përgjatë kohëve të fundit. Dyshohet se autorët kanë dashur të marrin vetëm disa dokumente, të cilat i mbante në kasafortë.
