Pas vendimit të Gjykatës, e cila dënoi me 4 vite burg Behar Pemën, i cili i dehur në timon goditi makinën e 4 vajzave të reja, duke i marrë jetën Lusinda Garunja dhe Zheneta Qellia, ka reaguar e ëma e njërës prej viktimave.
Përmes një postimi të ndarë në rrjetet sociale, nëna e Lusindës shkruan se sipas Gjykatës jeta vlejti vetëm 4 vite burg. Ndër rreshta, ajo shkruan se vajzën e saj bashkë me shoqen që aksidenti u mori jetën, u vranë për së dyti me vendimin që dha Gjykata.
“Me 13 shtator ne ditelindjen tende Lusi, fryma e jeta jeme, ta moren jeten padrejtesisht… ne nje dite kur si cdo e re don me e gezu, ti me erdhe e pajete e veshun si nuse, ashtu si cdo nane don me e pa bijen e vet, por ne arkivolin e ftofte… E dje ty e shoqen tande Xheni te vrane per se dyti… ia lame ne dore drejtesise e nuk kerkume vetegjygjesi, e jeta dy vajzave te vdekuna dhe e dy te tjerave qe shpetune nga dora e Zotit vlejti vetem 4 vite denim per autorin… Si mundet me ndodh e si nuk permbyset kjo bote…. Edhe sa gjame duhet me ndodhe qe i papergjegjshmi me marre denimin e meritum e mos me e pesu edhe shum familje te tjera dhimbjen tone”, shkruan nëna.
Reagimi i saj vjen pasi Behar Pema, është dënuar vetëm me 4 vite burg nga Gjykata e Tiranës, pasi përplasi makinën ku udhëtonin 4 vajza, 2 prej të cilave humbën jetën, pasditen e 13 shtatorit në tunelin e autostradës Tiranë-Elbasan.
