Gjykata e Durrësit ka ndryshuar masën e sigurisë për ish-drejtoreshën e filialit të Postës Shqiptare në Durrës, Elisabeta Mataj, duke e zëvendësuar “arrestin në burg” me masën “arrest në shtëpi”.
Mataj ndodhej në paraburgim që prej muajit korrik, pasi u vu nën hetim për përvetësimin e rreth 69 milionë lekëve të rinj, fonde të destinuara për pagesën e pensioneve në degët e Postës Shqiptare në Shijak dhe Krujë.
Në fazën fillestare të hetimit, Gjykata e Durrësit caktoi ndaj Elisabeta Matajt masën e sigurisë “arrest në burg”. Vendimi u ankimua nga mbrojtja, por edhe Gjykata e Apelit e la në fuqi masën e arrestit në burg, duke bërë që ish-drejtoresha të vijonte qëndrimin në paraburgim.
Në këtë dosje penale janë përfshirë edhe dy punonjëse të tjera të Postës Shqiptare, të cilat dyshohet se kanë pasur rol në skemën e përvetësimit të shumës së konsiderueshme të parave.
Bëhet fjalë për Valbona Dunin, ish-shefe e financës, dhe Paola Danën, arkëtare. Ndryshe nga Mataj, ndaj tyre u caktua që në fillim masa e sigurisë “arrest në shtëpi”.
Sipas dyshimeve të ngritura nga organi i akuzës, fondet që duhej të përdoreshin për pagesën e pensioneve në filialet e Postës në Shijak dhe Krujë nuk janë administruar sipas procedurave dhe një shumë prej rreth 69 milionë lekësh të rinj rezultoi e munguar.
Hetimi synon të përcaktojë përgjegjësinë konkrete të secilës prej të dyshuarave, mënyrën se si janë kryer veprimet financiare dhe destinacionin e parave. Elisabeta Mataj, Valbona Duni dhe Paola Dana vijojnë të jenë nën hetim dhe përgjegjësia e tyre penale do të përcaktohet në përfundim të procesit gjyqësor.
Discussion about this post