Gjykata e Apelit ka rrëzuar vendimin e Gjykatës së Shkodrës për masën e sekuestros preventive të vendosura ndaj biznesmenit shkodran Ago Gjolaj dhe personave të lidhur me të, konkretisht të shoqërisë tregtare “B.M” SHPK, me veprimtari tregtimin e artikujve të shumëllojshëm, huadhënie etj.
Biznesmeni Ago Gjolaj njihet si distributor i pijes energjike “8S2” teksa është nën hetim për kryerjen e veprës penale “Pastrimi i produkteve të veprës penale ose veprimtarisë kriminale”. Vendimi është marrë nga gjyqtari i Apelit të Përgjithshëm, Genti Shala.
Sipas Prokurorisë së Shkodrës, biznesmeni Ago Gjolaj ka dyshime se merret me kontrabandimin dhe tregtimin e mallrave kontrabandë si dhe është evidentuar si pjesëmarrës në grup kriminal që merret me trafikimin e lëndëve narkotike. Po ashtu, sipas Prokurorisë, Ago Gjolaj së bashku me dy vëllezërit e tij janë hetuar disa herë nga autoritet shqiptare madje edhe janë dënuar për vepra penale të ndryshme, si kontrabandë, tregtim mallrash kontrabandë, etj.
Në pak javë hetime, ku u përfshinë edhe anëtarë të tjerë të familjes Gjolaj, Prokuroria e Shkodrës ngriti dyshime se biznesmeni dhe të afërmit e tij nuk justifikonin pasurinë e krijuar me burime të ligjshme. Nën këto dyshime dhe pas një analize të detajuar financiare, Prokuroria mori lejen e gjykatës për sekuestrimin e aseteve të tyre.
Nën sekuestro u vendos kompania “B.M” shpk, një objekt biznesi me sipërfaqe 2592 m2, 97 automjete të shoqërisë, si edhe shuma e parave në llogaritë e Sonjela Gjolaj bashkëshortja e biznesmenit, Ago Imer Gjolaj dhe subjektit tregtar.
Por, tashmë ky vendim i Gjykatës së Shkodrës është rrëzuar nga Gjyaka e Apelit të Përgjithshëm.
Vlen të theksohet fakti se pikënisja e hetimit pasuror ndaj Ago Imer Gjolajt dhe bashkëshortes së tij Sonjela Gjolaj ishte një jaht i blerë në Malin e Zi nga kjo e fundit Shitësi ishte Sasa Jakica, një qytetar malazez i përfshirë në veprimtari kriminale dhe pastrim parash, sipas informacioneve të zyrtarëve të Podgoricës.
Discussion about this post