Gjykata e Posaçme e Apelit për Korrupsionin dhe Krimin e Organizuar, ka reaguar zyrtarisht për përfundimin e gjykimit ndaj të pandehurit Adriatik Llalla.
Në vendimin e gjykatës, deklarohet fajtor Adriatik Llalla për kryerjen e veprës penale, refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publik ose i çdo personi tjetër që ka detyrimin ligjor për deklarim.
Në të sqarohen edhe pasuritë që sekuestrohen dhe i kalojnë shtetit ku përfihen, pasuria e paluajtshme apartament, me sipërfaqe 67.2 m2, e ndodhur në Durrës. Pasuritë e paluajtshme të llojit tokë arë, 4 (katër) pasuri, me sipërfaqe gjithsej 22.300 m2 të ndodhura në Tiranë.
“Bazuar në faktin se vendimi i mësipërm i Gjykatës së Posaçme të Apelit për Korrupsionin dhe Krimin e Organizuar është i formës së prerë, Prokuroria e Posaçme kundër Korrupsionit dhe Krimit të Organizuar ditën e sotme, me datë 22.09.2021 ka nxjerrë urdhrin për ekzekutimin e këtij vendimi penal, duke ngarkuar Policinë e Shtetit për ekzekutimin e tij” – shkruhet në vendimin e Gjykatës.
Vendimi për burgimin e ish-Kryeprokurorit është në mungesë të tij, pasi ai është arratisur dhe dyshohet se ndodhet në Itali.
