Gjykata e Drejtësisë e Bashkimit Evropian ka shpallur një vendim të rëndësishëm që sfidon qeverinë italiane për dërgimin e emigrantëve të paligjshëm në Shqipëri.
Në përfundimet e saj, Gjykata thekson se një shtet anëtar mund të shpallë një vend të tretë si “të sigurt” për emigrantët, por kjo duhet të jetë e hapur për kontroll nga gjykatat kombëtare, raporton RaiNews.
Kjo do të thotë se autoritetet gjyqësore duhet të kenë qasje në informacionin që mbështet këtë shpallje dhe të mund të shqyrtojnë nëse është në përputhje me të drejtat e njeriut dhe legjislacionin evropian.
Ky vendim ka pasur pasoja të drejtpërdrejta për planin e qeverisë italiane, e cila kishte investuar 670 milionë euro për ndërtimin e qendrave të pritjes në Shqipëri.
Megjithatë, këto qendra kanë mbetur të nënpopulluara, me vetëm 18 emigrantë të regjistruar deri tani. Në përpjekje për të anashkaluar pengesat ligjore, qeveria e kryeministres Giorgia Meloni miratoi një dekret që përcaktonte një listë të vendeve të “sigurta”. Megjithatë, ky hap është kritikuar për kostot e larta dhe për mungesën e mbështetjes nga disa shtete të BE-së, si Spanja.
Në Shqipëri, ndonëse qendrat e pritjes janë ndërtuar, ka pasur shqetësime për kapacitetin e tyre dhe përkushtimin e nevojshëm për të menaxhuar fluksin e mundshëm të emigrantëve.
Discussion about this post