Gjykata e Shkallës së Parë Gjirokastër ka dhënë masën arrest me burg për 61-vjeçarin Vasil Mullaj, i akuzuar për ngacmim seksual ndaj 3 të miturve.
Seanca gjyqësore u shty për 30 minuta pasi të pandehurit i ra të fikët në sallën e gjyqit.
Panorama.al bën me dije se 61-vjeçari kishte disa ditë pa ngrënë në formë proteste ndaj akuzës që është ngritur ndaj tij.
Më pas, Vasil Mullaj ka dhënë dhe versionin e tij për ngjarjen për të cilën akuzohet. Ai ka pohuar se ka ndjekur nga shtëpia e tij katër fëmijë, mes të cilëve dhe 3 të miturit të cilët luanin me nipërit dhe mbesat e tij pasi nuk mund të duronte zhurmën që bënin fëmijët duke i larguar ata me fyerje.
Por në dosjen e përgatitur nga prokurori Julian Çafka, nga dëshmitë e prindërve, ata pretendojnë se 61-vjeçari i ka ngacmuar fëmijët e tyre në vendet intime.
Sipas dëshmive, ai u kishte ngritur fustanin fëmijëve dhe i ka prekur në organet intime. Këto pretendime janë kundërshtuar nga i pandehuri dhe avokati i tij Bernard Aliko.
Ky i fundit ka kërkuar prova të besueshme për klientin e tij duke sjellë në vëmendje përplasjet e vjetra mes familjeve që, sipas tij janë shkak i kësaj ngjarje.
Aliko kërkoi nga kryesuesja e trupës gjykuese që të merren prova të tjera ligjore për të vërtetuar akuzën. Për këtë, gjykata vendosi arrest me burg 45 ditor derisa organi i akuzës të sjellë prova të tjera.
61-vjeçari është denoncuar nga dy familje të fshatit Erind, me të cilat ka dhe lidhje krushqie, me akuzën se ka ngacmuar seksualisht tre vajza të mitura./Panorama.al
