Këngëtari Aleksandër Gjoka u përfshi në një aksident në zonën e Farkës para disa javësh dhe si pasojë ra në prangat e policisë. Pas aksidentit policia i bëri artistit testin e alkoolit, ku rezultoi se ishte në gjendje të dehur.
Pas kësaj ngjarje këngëtari doli përpara gjykatës, dhe u vendos masa “arrest shtëpie”. Ndërkohë mbrëmjen e djeshme në një lidhje direkte nga shtëpia e tij për emisionin ”Soiree” ai ka folur për herë të parë pas kësaj ngjarje.
Jonida Shehu: Gjatë këtyre ditëve që ti po vuan arrestin e shtëpisë, je në një farë mënyre i kufizuar. A ndihesh si rock-u në diktaturë? Dhe si ndihet Sandër Gjoka që të mos ketë mundësi të mos lëvizi lirshëm dhe të mos e ketë lirinë absolute siç ai është mësuar gjithmonë ta ketë?
Aleksandër Gjoka: Qesh. Jo, këtu kam hapësirë. Nuk krahasohet ky arresti im në demokraci në krahasim me kohën e diktaturës. Jo, jo është si nata me ditën. Unë po e shijoj arrestin këtu shumë bukur nën rrezet e diellit përvëlonjës. Jam mirë. Ndoshta më mungon skena.
