Trupa gjyqësore e Gjykatës së Lartë të Republikës së Shqipërisë ka reaguar pas ngjarjes tragjike të ndodhur në Gjykatën e Apelit, ku gjyqtari Astrit Kalaja u vra me armë zjarri brenda sallës së gjyqit.
Në një deklaratë zyrtare, Gjykata e Lartë shpreh tronditjen dhe dhimbjen e thellë për humbjen e kolegut të tyre dhe përcjell ngushëllime për familjen, të afërmit dhe komunitetin gjyqësor.
“Kjo ngjarje e rëndë është një sinjal alarmi për gjendjen e sigurisë në të cilën ushtrojnë funksionin gjyqtarët e Republikës dhe për gjendjen shqetësuese të infrastrukturës në të cilën funksionojnë shumë prej gjykatave shqiptare,” – thuhet në deklaratë.
Gjykata thekson se në një shtet të së drejtës, gjyqtari duhet të jetë i mbrojtur dhe i respektuar, jo vetëm fizikisht, por edhe përmes klimës publike dhe gjuhës së përdorur ndaj sistemit të drejtësisë.
“Çdo formë denigrimi apo përbuzjeje ndaj gjyqtarit cenon autoritetin e drejtësisë dhe besimin e qytetarëve në shtetin ligjor,” vijon më tej deklarata.
Në përfundim, Gjykata e Lartë u bën thirrje institucioneve përgjegjëse për të garantuar sigurinë fizike dhe institucionale të gjyqtarëve, duke e konsideruar këtë si një përgjegjësi shtetërore që kërkon veprim të menjëhershëm dhe të qëndrueshëm.
“Mbrojtja e gjyqtarëve është mbrojtje e vetë drejtësisë dhe e besimit të publikut tek shteti i së drejtës.”
Discussion about this post