Gjykata e Lartë ka refuzuar rekursin e trafikantit të drogës, Princ Dobroshi, i cili kundërshtonte vendimin e Apelit për ekstradimin e tij në Gjermani.
Apeli i Juridiksionit të Përgjithshëm vendosi më 9 prill 2024 miratimin e ekstradimit, ku i dërgoi edhe Ministrisë së Drejtësisë vendimin e zbardhur. Në këto kushte, Dobroshi e dërgoi dosjen në Gjykatën e Lartë, ku kërkonte të prishte vendimin.
Sipas të dhënave, Gjykata e Hamburgut ka nxjerrë urdhër-arresti për 59-vjeçarin Princ Dobroshi, pasi dyshohet për kryerjen e veprës penale të “Trafikimit të lëndëve narkotike”, të kryer në bashkëpunim, si pjesëtar i një grupi kriminal.
Më 29 mars të këtij viti, shtetasi kosovar, i njohur edhe me nofkën “Peshkaqeni”, ra në rrjetën e SPAK, ku iu sekuestruan 10 llogari bankare me vlerë 133 mijë euro, një vilë në Gjirin e Lalzit, dy apartamente te Kodra e Diellit, një apartament te Liqeni i Thatë, një makinë Volvo dhe shoqëria tregtare ‘SLAI’. Këto asete i kishte në bashkëpunim me kunatin e tij, të quajtur Olsi Syziu.
Në vitin 1993, Dobroshi ishte kapur në Norvegji dhe ishte dënuar me 14 vjet burg për trafikim të heroinës. Në vitin 1997, Princi kishte arritur të arratisej në mënyrë spektakolare nga burgu, duke shkuar në Çeki, ku raportohet se ka dominuar trafikimin e drogës atje.
Discussion about this post