Gjykata e Lartë vendosi të lërë në fuqi këtë të martë vendimin e Gjykatës së Apelit Durrës, për ekstradimin e Alket Hatijës.
I ashtuquajtur “Zoti i Drogës”, Hatija pritet të ekstradohet në Itali për të vuajtur një dënim prej 20 vitesh burg dhënë nga drejtësia italiane. Në Shqipëri ai ka vuajtur 16 vite burg, ndërsa në Itali ka 20 vite të tjera për të vuajtur. Hatija është arrestuar në vitin 2017 për llogari të drejtësisë italiane, pasi kërkohej në kuadër të një dënimi në mungesë me 20 vjet burg në Milano.
Dënimi për të u dha pasi akuzohet për transportimin në Milano, në vitet 2003-2004 të 350 kilogramëve heroinë dhe 190 kilogram kokainë, ngarkesa këto me vlerë 35 deri në 45 milion euro.
Ai u prangos më 8 korrik, por Gjykata e Durrësit e cilësoi të jashtëligjshëm arrestimin e tij dhe katër ditë më vonë më, më 11 korrik 2017 ai u la i lirë.
Në vitin 2019 Apeli i Durrësit kërkoi ri arrestim, në pritje të ekstradimit të tij në Itali, për të vuajtur dënimin me 20 vite burg. Gjykata e Apelit vendosi si masë sigurie atë të “arrestit në burg” për “Baronin e drogës”, i cili akuzohet nga autoritetet italiane për trafikimin e 350 kilogramëve heroinë.
Sipas autoriteteve italiane, Alket Hatija është një nga bosët më të mëdhenj të trafikut të drogës nga Shqipëria drejt Italisë.
