Ditën e sotme është mbajtur seanca gjyqësore në mungesë për Domart Konjarin, teksa Gjykata e Posaçme e Apelit e ka dënuar me 15 vite burg. I njëjti vendim është dhënë dhe nga Gjykata e Shkallës së Parë, aty ku pati një sërë deklaratash nga dëshmitarët në dëm të Konjarit.
Domart Konjari është një emër i njohur dhe me precedencë të theksuar kriminale. Konjari akuzohet për trafik të lëndëve narkotike dhe organizata kriminale. Ai është arrestuar dhe në vitin 2015 pas një urdhër-arresti të lëshuar nga autoritet franceze. Konjari u lirua 5 muaj më vonë, pasi Apeli i Krimeve të Rënda ndryshoi masën e sigurisë ndaj tij, nga “Arrest me burg” në “Detyrim paraqitje”
Konjari gjithashtu cilësohet si autori kryesor i ekzekutimit të Devi Kasmit, me të cilin kishin bashkëpunim për sa i përket trafikimit të lëndëve narkotike. Gjithashtu, ai dyshohet se është marrë dhe me aktivitete kriminale në Spanjë.
Lidhja e Domart Konjarit me Devi Kasmin:
Devi Kasmi është personi i cili u ekzekutua me 4 plumba pasditen e 29 janarit të vitit 2018. Sipas informacioneve të qarkulluara, autorët e ngjarjes kanë qene duke pritur me motor daljen nga banesa të Kasmit, më pas kanë shtënë drejt tij duke i shkaktuar dhe vdekjen. Në lidhje me këtë ngjarje u arrestua dhe Ethimiu Efthimius, pasi dyshohet se ai ka qenë personi i cili ka goditur për vdekje Kasmin e më pas është larguar me një fugon më targë “AA 231 JH”. Kjo konfirmohet nga fakti se Ethimius është filmuar nga kamerat e sigurisë pranë banesës së Kasmit, në të njëjtën orë kur dhe ngjarja ka ndodhur. Në momentet kur greku ka qenë duke hipur në fugon, kamerat e sigurisë sërish kanë identifikuar një tjetër person që e priste dhe ai në rolin e bashkëpunëtorit, Elton Halipaj. Fugoni ishte blerë pikërisht nga grupi i drejtuar prej Aurel Hoxhallarit edhe ky person i shpallur në kërkim. Sipas deklaratave të dhëna nga Halipaj, bëhej me dije se fugoni ishte paguar nga Malvin Dinellari. Përplasja me grupet rivale të drogës, është parë si shkaku kryesor që çoi në ekzekutimin e Devi Kasmit. Për sa i përket emrit të Ethimiu Efthimius, ai ka pasur rolin e ekzekutorit.
