Gjykata Kushtetuese ditën e sotme ka zbardhur vendimin e mosshkarkimit të Presidentit Ilir Meta. Në konkluzionet e Gjykatës Kushtetuese ka prekur edhe çështjen e lënies së mandateve nga opozita, ku sipas saj ka deformuar konceptin e mandatit përfaqësues dhe cenon parimin e përfaqësimit të zgjedhësve në parlament.
“Gjykata vlerëson se dorëzimi në bllok i mandateve parlamentare, në kuadrin e një krize besimi të ndërsjellë midis aktorëve politikë, deformon konceptin e mandatit përfaqësues dhe cenon parimin e përfaqësimit të zgjedhësve në parlament. Në këtë këndvështrim, duhet theksuar se mjedisi thellësisht i polarizuar politik, mungesa e dialogut dhe e dëshirës së aktorëve politikë për të punuar së bashku me të gjitha pjesët e shoqërisë, kthehen në faktorë që prekin cilësinë e veprimtarisë parlamentare, pengojnë realizimin e vlerave kushtetuese dhe thyejnë besimin publik, në dëm të integrimit social dhe zhvillimit kombëtar” – thuhet në vendim.
Discussion about this post