Gjykata Kushtetuese rrëzon dekretin e Presidentit për zgjedhjet në Bashkinë e Tiranës

Gjykata Kushtetuese pezullon dekretin e Presidentit për zgjedhjet parlamentare të 9 nëntorit.

“Gjykata Kushtetuese vendosi njezëri të kalojë çështjen me kërkues Erjon Veliaj në seancë plenare publike në datë 31 Tetor 2025 dhe të pezullojë Dekretin e Presidentit për pjesën që cakton datën e zgjedhjeve në Bashkinë Tiranë”, njofton Kushtetuesja.

Më 2 Tetor, avokatët e Veliajt depozituan në Kushtetuese një ankim ndaj dekretit të Presidentit të Republikës, që shpalli vakancën në Bashkinë e Tiranës dhe vendosi datën e zgjedhjeve të pjesshme.

Me vendimin e Kushtetueses, do të thotë që zgjedhjet e pjesshme nuk do të zhvillohen.

Kujtojmë se kreu i KQZ, Ilirjan Celibashi ka deklaruar në media se nëse ndodh që Gjykata Kushtetuese do të kthejë dekretin, zgjedhjet nuk do të zhvillohen.

Në kërkesën e tij, Veliaj e cilësonte dekretin “antikushtetues” dhe theksonte se mandati i kryetarit të bashkisë “nuk është personal, por përfaqëson sovranitetin e qytetarëve të Tiranës”.

Nga ana tjetër, Presidenti Bajram Begaj, në një intervistë televizive, u përpoq të justifikonte dekretin e tij, duke thënë se ai ishte “frut i një analize të mirëfilltë juridike”.

Sipas tij, shkarkimi i Veliajt nga Këshilli i Ministrave, me propozim të Këshillit Bashkiak, ishte bazuar në nenin 62 të ligjit për qeverisjen vendore që lidhet me mungesën në detyrë për tre muaj dhe jo në nenin 115 të Kushtetutës, që parashikon rastet e shkeljeve të rënda.

Megjithatë, duket se argumentet e “analizuara” të kreut të shtetit nuk bindën as Gjykatën Kushtetuese, e cila vendosi pezullimin e dekretit. Pavarësisht se kjo gjykatë është perceptuar shpesh si nën kontrollin e mazhorancës dhe kryeministrit Edi Rama, kësaj here ajo nuk arriti të mbulojë shkeljet ligjore dhe procedurale që shoqëruan vendimin presidencial.