Fredi Beleri nuk do të lirohet nga qelia, të paktën para shtatorit. Gjykata e Fierit vendosi këtë të mërkurë të shtyjë për në 2 Shtator seancën për kërkesën e Belerit. Ky i fundit kërkon lirimin me kusht nga qelia me argumentin se ka vuajtur 2/3 e dënimit.
Kjo është e disata herë që shtyhet seanca për Belerit, ndërsa më herët, mbrojtja e tij ka deklaruar se po tentohet të mbahet me qëllim në qeli në mënyrë që ti mohohet kontributi në fushatën e zgjedhjeve të parakohshme në Himarë (4 Gusht). Gishtin e akuzën e ngriti edhe njëherë nga kryeministri Edi Rama.
Në seancën e parë që u zhvillua më 25 korrik, nuk u mor asnjë vendim për shkak se Drejtoria e Burgjeve nuk paraqiti raportin e vlerësimit pasi mungonte dëshmia e penalitetit. Edhe në seancën pasardhëse Beleri qëndroi vetëm 20 minuta në ambientet e Gjykatës së Fierit për t’u kthyer sërish në burgun e sigurisë së lartë për shkak të mungesës së dokumentacionit.
Edhe kësaj radhe, kërkesa e Fredi Belerit për lirimin me kusht është shtyrë për datën 2 shtator. Drejtoria e Burgjeve ka dorëzuar më në fund raportin për Belerin, sipas avokatit Geni Gjyzari.
Avokati ka deklaruar se burgjet janë në varësi të kryeministrit, i cili, “për shkak të frikës nga zgjedhjet që do të mbahen së shpejti në Himarë, ka urdhëruar që Beleri të mos lirohet”.
Seanca është shtyrë gjithashtu për shkak të lejes së zakonshme të gjyqtarit.
“Fatkeqësisht, Beleri do të vazhdojë të vuajë dënimin deri në kthimin e gjyqtarit”, u shpreh për mediat avokati Geni Gjyzari.
Discussion about this post