Ish-Sekretari i Ministrisë se Financave Arlind Gjokutaj do të qëndrojë në liri edhe pse u cilësua fajtor nga Gjykata e Tiranës dhe sipas hetimeve, është përgjegjës për një dëm prej 1.2 milionë eurosh shkaktuar shtetit.
Gjykata e Tiranës ka dënuar me dy vite burg që konvertohet në shërbim prove ish-Sekretarin e Përgjithshëm të Ministrisë se Financave Arlind Gjokutaj, i akuzuar për abuzim me 1.2 mln euro.
Prokuroria e Tiranës kishte kërkuar dy vite burgim për shpërdorim detyre të ish zyrtarit të lartë. Trupa pranoi më herët ndarjen çështjes për ish zyrtarin e lartë, i cili ka pranuar gjykim te zakonshëm, ndërsa dy të akuzuarit e tjerë kërkuan gjykim të shkurtuar. Ndërsa u vendos pushimi i çështjes për drejtorin juridik të Ministrisë së Financave Fatmir Hoxha.
Sekretari Gjokutaj është arrestuar me akuzën e shpërdorimit të detyrës, ndërsa iu zëvendësua dy herë masa e sigurisë nga arrest në burg në arrest shtëpie dhe më pas më detyrim paraqitje. Arrestimet erdhën pas hetimeve ndaj shtetasit Ilir Thana i cili akuzohet për mashtrim.
Gjithçka nisi pas një kallëzimi të një banke të nivelit të dytë drejtuar Prokurorisë së Tiranës për një kredi të pashlyer, që zbuloi skandalin se si Ilir Thana u shpërblye dy herë për një pronë të blerë në vitin 1992, e cila iu kthye ish-pronarit tre vite më vonë. Më vendim gjykate, Ilir Thanës ju kthen paratë për blerjen e magazinës në vlerën e çmimit të tregut të kohës.
Më konkretisht, mes shtetasit Ilir Thana dhe Drejtorisë së Shërbimit Qeveritar u lidh një kontratë blerjeje për privatizimin e një objekti magazinë nr.2 në vitin 1992.
Pas vendimit të gjykatës së Apelit të Tiranës, kontrata u shpall e pavlefshme dhe palët u kthyen në pozicionin e mëparshëm.
Edhe pse qytetari u pagua në vitin 2015 nga Ministria e Financave, në vitin 2022 pavarësisht kësaj, së bashku me një zyrë përmbarimore nën hetim u krye rivlerësimi duke i vendosur çmimin prej 145 milionë lekë të reja që shteti duhet t’ia paguante sërish. E njëjta ministri i kaloi sërish 480 milionë lekë Thanës dhe të të motrës duke i sjellë shtetit një dëm të konsiderueshëm.
Arlind Gjokutaj u arrestua më 11 Janar të vitit 2023, ndërkohë që u lirua më pas nga Gjykata e Apelit.
Arlind Gjokutaj u emërua si sekretar i përgjithshëm i Ministrisë së Financave dhe Ekonomisë në tetor të 2021. Më herët, ai ka mbajtur postin e drejtorit të doganave, ka qenë pjesë e Njësisë Speciale të Antikorrupsionit dhe Antievazionit si edhe te Drejtoria e Parandalimit të pastrimit të parave.
Discussion about this post