Deputeti demokrat Gazment Bardhi ka reaguar pas vendimit të gjykatës për të marrë në shqyrtimin ankimin e Enkelejd Alibeaj ndaj vendimit të gjyqtarit Agron Zhukri që mandatoi Komisionin e Rithemelimit si organi drejtues i PD.
Sipas Bardhit vendimi i gjyqtarit Agron Zhukri ishte tërësisht i paligjshëm, ndërsa duke iu referuar Berishës ai shprehet se vendimet e gjykatës duhet të zbatohen dhe se ai nuk mund të jetë me dy standarde.
“Siç ka thënë edhe Sali Berisha më 25 Mars: Vendimet e gjykatave zbatohen, nuk mund te komentohen, nuk mund te sulmohen. Nuk mund të kesh dy standarte, kur na pëlqen vendimi e zbatojmë, kur nuk na pëlqen e sulmojmë. Vendimi i gjyqtarit Agron Zhukri ishte dhe është tërësisht i paligjshëm. Qetësisht institucionet legjitime të partisë kanë ndjekur dhe po ndjekin rrugën ligjore për zhbërjen e atij vendimi të paligjshëm. Askush nuk duhet të shqetësohet nga zbatimi i ligjit dhe duhet të ruaj qetësinë derisa drejtësia ti shkojë deri në fund kësaj çështje”, tha Bardhi.
Bardhi shton se palë në një proces ku shqyrtohet kërkesa për regjistrim të një statuti të një partie politike, është vetëm partia politike, dhe se kush e ka të drejtën e përfaqësimit e cakton gjykata në çështje themeli.
“Kërcënimet ndaj gjyqtarëve, dërgimi i mercenarëve të rikthyer sëfundmi brenda gjyqësorit për të joshur gjyqtarët, blerja apo shitja e vendimeve gjyqësore, kthimi i selive të partive në salla gjyqi të humbur, i përkasin drejtësisë së korruptuar alla Zhukri dhe një mentaliteti të vjetër politik që ka mbajtur peng të ardhmen e Shqipërisë. Për qartësi të opinionit publik, dua të sqaroj se palë në një proces ku shqyrtohet kërkesa për regjistrim të një statuti të një partie politike, është vetëm PARTIA POLITIKE, ndërkohë se kush e ka të drejtën e përfaqësimit e cakton gjykata në çështje themeli”, shtoi ai.
Discussion about this post