Gjykata e Tiranës ka dënuar me 21-vite burg, Izet Haxhinë, ish-truprojën e Sali Berishës, për vrasjen e ish-deputetit Azem Hajdari në 12 shtator 1998. Sipas njoftimit të Gjykatës, Haxhisë do ti përllogaritet dhe koha kur ka qenë në burg pa u dhënë vendimi, ndërsa dënimin do ta kryejë në një burg të sigurisë së zakonshme.
Në seancën e sotme, vetë Izet Haxhia nuk ishte i pranishëm në sallë, por nëpërmjet një deklarate, ai kërkonte pafajësinë nga trupa gjykuese, kërkesë që iu rrëzua. Ai gjithashtu nuk do të përfitojë as “favoret” e gjykimit të shkurtuar për t’i mundësuar vetes uljen e 1/3 të dënimit, pasi gjatë gjithë procesit gjyqësor nuk ka bërë asnjë kërkesë të tillë.
Dosja e vrasjes së Hajdarit u kthye për t’u rigjykuar nga e para në dhomën penale të Gjykatës së Tiranës. E gjitha pas ekstradimit të Haxhisë nga Turqia dhe kërkesës së tij në vitin 2018 për t’u përballur edhe njëherë me të gjithë dëshmitarët e ngjarjes, përfshirë edhe liderin historik të PD-së, Sali Berisha.
Izet Haxhia ishte dënuar në mungesë me 25 vite burg për vrasjen e Hajdarit. Pas 17 vitesh në mungesë dhe azil në Turqi, Haxhia është rikthyer me vullnetin e tij në Shqipëri duke kërkuar rihapjen e dosjes, pasi ai kurrë nuk i ka pranuar akuzat e ekzekutimit të deputetit Azem Hajdarit në vitin 1998. Ndonëse u rikthyer për të vërtetuar pafajësinë që pretendon, gjykata vendosi dënimin me burg.
Discussion about this post