Kryebashkiakja e Shkodrës, Voltana Ademi ka reaguar pas vendimit të Gjykatës për të emëruar kryetarin e Bashkisë së Lezhës, Pjerin Ndreun Kryetar të Shoqatës së Bashkive, duke hedhur akuza se ky vendim është jo i drejtë e joligjor.
Ademi shkruan në Facebook se me veprime të tilla PS po kontrollon edhe Shoqatën e Bashkive duke qenë në kundërshtim me Kushtetutën.
“Për fat të keq, gjykatësi i çështjes e pranoi kërkesën dhe vendosi me një vendim të jashtligjshëm kapjen e Shoqatës së Bashkive të Shqipërisë. Ky vendimi është jo i drejtë e joligjor. Veprime të tilla, duke kapur dhe kontrolluar Shoqatën e Bashkive, nga Partia Socialiste, nga individë që nuk kanë mandatin për përfaqësim, për të qenë anëtarë të Shoqatës së Bashkive, janë në kundërshtim me Kushtetutën, statutin e shoqatës, dëmtojnë autonominë dhe parimet e demokracisë vendore”, shkruan Ademi.
Ndër të tjera, ajo ka hedhur akuza se personat që kanë marrë vendimin nuk janë pjesë e shoqatës që ajo drejtonte dikur.
“Personat që e kanë lajmëruar ketë vendim nuk janë anëtarë të shoqatës që unë drejtoj. Ata janë anëtarë të Shoqatës për Autonominë Vendore, e krijuar nga Edi Rama në 2010-ën. Pas votimeve të paligjshme të 30 Qershorit 2019, anëtarë të kësaj shoqate janë të 60 bashkitë që urdhërohen nga Edi Rama. Pra, edhe ato bashki, si Lezha, dikur anëtare të Shoqatës së Bashkive të Shqipërisë, janë larguar për t’iu bashkuar shoqatës politike të krijuar nga Partia Socialiste”, shprehet Ademi.
Ademi njofton gjithashtu se Gjykata Kushtetuese është duke shqyrtuar kërkesën e Shoqatës së Bashkive të Shqipërisë, për procesin antikushtetues të votimeve vendore të datës 30 qershor 2019, teksa shton se shumë shpejt do të ketë një vendim të qartë.
