‘O gjykatës bëj drejtësi, lër Veliajn në qeli! Qytetarët protestojnë para Gjykatës së Lartë

Gjykata e Lartë po rigjykon sot rekursin e bërë nga kryebashkiaku i Tiranës, Erion Veliaj, kundër masës së sigurisë ‘arrest në burg’.

Rigjykimi bëhet në zbatim të vendimit të Gjykatës Kushtetuese të majit 2026, që vlerësoi se Gjykata e Lartë nuk kishte arsyetuar se përse ‘arresti në burg’ ishte e vetmja masë e përshtatshme dhe as proporcionalitetin e kësaj mase me funksionin e Veliajt si kryebashkiak.

Seanca në Gjykatën e Lartë nisi në orën 09:30 dhe po zhvillohet në Dhomë Këshillimi, pa praninë e palëve.

Ndërkohë përpara Gjykatës së Lartë janë mbledhur një grup protestuesish që kërkojnë që Veliaj të mbetet në qeli.

Me thirrjet “o gjykatës bëj drejtësi, lër Veliajn në qeli”, protestuesit mbërritën para godinës në kohën që gjykatësit ishin në Dhomë Këshillimi.

Njëri prej tyre argumenton pse Veliaj duhet të qëndrojë në burg ndërsa shton se dalja e tij do ishte një goditje e madhe për sistemin e drejtësisë në Shqipëri.

“Veliaj ka qenë ai modeli i politikanit të cilin ne e kemi kundërshtuar prej fillimi. Ka qenë ai modeli i politikanit i cili duke u zvarritur e duke mos u përballur kurrë as me kundër kandidatët, as me qytetarët, ka arritur aty ku e kemi parë të gjithë.

Ama nëse duam një fakt për Erion Veliajn që duhet të vazhdojë të qëndrojë në qeli, është thjesht të bëjmë një xhiro rreth Tiranës dhe duhet të kuptojmë se i gjithë ky pastrim parash është bërë me bekimin dhe nën hundën e Veliajt.

Edhe kështu që për mua dhe për çdo qytetar, vetëm ndërtimet në Tiranë janë një arsye e mjaftueshme që ai të vazhdojë të qëndrojë në burg. Edhe sigurisht që edhe përgjimet, edhe provat të cilat kanë dalë në raport me Veliajn, janë arsye dhe argumente të mjaftueshme që ai duhet të qëndrojë në burg. Edhe një dalje e Veliajt sot do ishte një goditje e madhe për sistemin e drejtësisë në Shqipëri, për shkak se do cenonte pavarësinë e tij”, u shpreh ai.