Lulzim Berisha, i arrestuar në Spanjë për llogari të autoriteteve shqiptare, kërkon të mos ekstradohet. Në seancën gjyqësore për ekstradimin e tij, sipas raportimeve të mediave spanjolle, Lulzim Berisha është shprehur se në Shqipëri i rrezikohet jeta.
“Infobae” shkruan se Lulim Berisha ka kundërshtuar ekstradimin me argumentin se ka frikë për jetën në Shqipëria, sepse pret një hakmarrje të mundshme për veprimet e tij të kaluara.
Ai ka deklaruar se në Shqipëri ka rënë pre e katër sulmeve dhe shtëpia e tij është goditur me anti-tank.
Berisha e ka përshkruar veten si një sipërmarrës dhe është shprehur i penduar që familja e tij duhej të ikte në Suedi nga frika e hakmarrjeve.
“Po ashtu, ai ka treguar se mund të përfitojë pjesërisht nga një ligj amnistie i miratuar në vendin e tij dhe se Prokuroria shqiptare ka kërkuar mbylljen e hetimeve në lidhje me sulmin me bombë në ashensor dhe se ka kërkuar azil në Spanja”, raporton media spanjolle.
Të njëjtin argument dha edhe mbrojtja e Lulzim Berishës. Ai tha se ka raporte të policisë që tregojnë se klienti i tij mund të jetë objekt hakmarrjeje për ngjarjet e kaluara. “I hodhën granatë, donin ta vrisnin, i vunë bomba…”, shpjegoi ai.
Kundër ka dalë prokuroria spanjolle që i ka kërkuar gjykatës ekstradimin e Lulzim Berishës.
Lidhur me hakmarrjen e mundshme të mëshuar nga mbrojtja, prokurori shpjegoi se kjo mundësi “është një ndjenjë e zakonshme njerëzore në shumicën e kulturave”, por ka sqaruar se është kontradiktore që Lulzim Berisha ta pretendojë këtë dhe në të njëjtën kohë ka kërkuar largimin e tij të parakohshëm nga burgu në Shqipëri.
Gjithashtu, prokurori vuri në dukje se në kërkesën e mbrojtjes për moskestrdim ka një dokument të vitit 2015 që pretendon se Lulzim Berishës i rrezikohet jeta, por jashtë burgut. Pra, nuk ka frikë racionale në rastin kur lihet në duart e organeve të shtetit kërkues, argumentoi akuza.
Gjykata do të vendosë në një moment të dytë lidhur me ekstradimin e Lulzim Berishës.
Përballja me drejtësinë në Shqipëri
Pas arrestimit të bujshëm të 6 prillit 2006, Prokuroria e Krimeve të Rënda ngriti 10 akuza për Lulzim Berishën, mes të cilave krijimin e një organizate kriminale dhe një seri vrasjesh e atentatesh të kryera mes viteve 1998-1999.
Më 16 janar 2012, Lulzim Berisha u dënua me burgim të përjetshëm nga Gjykata e Shkallës së Parë të Krimeve të Rënda për pesë vrasje dhe disa atentate, vendim i cili u la në fuqi edhe nga Apeli.
Megjithatë, një vendim i Gjykatës së Lartë i vitit 2014 rrëzoi dënimin maksimal dhe vendosi 25 vjet burg për ish-kreun e bandës së Durrësit.
Pasi i shpëtoi burgimit të përjetshëm, Lulzim Berisha i drejtoi Gjykatës së Durrësit një lumë kërkesash për ulje dënimi gjatë viteve 2015-2016 dhe fitoi lirinë me kusht nga Gjykata e Apelit të Durrësit, edhe falë mbështetjes së ish-kreut të bashkisë së Durrësit, Vangjush Dako, i cili i dha gjykatës garanci se Berisha do të punësohej në Bashkinë e Durrësit, nëse ai nuk gjente punë në sektorin privat.
Ky vendim u hodh poshtë nga Gjykata e Lartë në dhjetor të vitit 2021, duke e rikthyer Berishën në listën e personave të kërkuar.
Në dhjetor 2020, SPAK e akuzoi Berishën dhe kunatin e tij edhe për vrasjen e Vajdin Lamajt, por tre vjet më vonë, prokurorët kërkuan pushimin e akuzave në gjykatë për mungesë provash (Fakt që u përdor nga Lulzim Berisha edhe në seancën gjyqësore në Spanjë). Kërkesa e SPAK u refuzua nga Gjykata në muajin Shkurt, që e riktheu dosjen për rihetim.
Lulzim Berisha u arrestua në vitin 2023 në Alicante të Spanjës, për llogari të autoriteteve shqiptare.
Discussion about this post