Avokatët e Lulzim Bashës kërkuan në seancën e sotme gjyqësore që të pezullohet gjyqi për regjistrimin e ndryshimeve statutore të 2 shtatorit.
Kjo ishte dhe kërkesë e përfaqësuesve të grupimit të Gazment Bardhit dhe avokatëve të ish-Kryeministrit Berisha, të cilët më herët kanë kërkuar që ky gjykim të pezullohet deri në një vendimmarrje nga Gjykata e Lartë dhe nga Gjykata Civile.
Bëhet fjalë për kërkesën e 7 deputetëve të PD që kërkuan të mos njihej Kuvendi i thirrur nga Lulzim Basha pasi Këshilli Kombëtar, në një mbledhje të mbajtur online në 27 korrik, ishte shprehur kundër thirrjes së Kuvendit.
Gjykata vendosi pezullimin e kërkesës për regjistrimin e ndryshimeve të statutit të 2 shtatorit, ashtu sikundër pretendonte Lulzim Basha.
Ndërkohë rrëzoi kërkesën e grupit Basha për të cilësuar si të falsifikuar aktet e Këshillit Kombëtar të mbajtur online në 27 Korrik.
Çlirim Gjata në emër të Rithemelimit tha se me tërheqjen e atyre që e mbajnë veten si përfaqësues të PD-së zyrtare praktikisht ka rënë fabula. “Erdhën dhe kërkuan pezullimin, pra erdhën te kërkesa jonë”, tha Gjata.
Rezart Kthupi, përfaqësues i PD-së së Bashës, tha se vendimi ishte i pritshëm. “Nuk kemi asgjë lidhur me vendimin, është në frymën e vendimit të Gjykatës së Apelit”, tha Kthupi.
Ndërkohë Marash Logu, përfaqësues i Gazment Bardhit, tha se bazuar në vendimin e Gjykatës, ëndrra e Lulzim bashës për të qenë kryetar i Grupit Parlamentar të PD, kundër vullnetit të deputetëve, do të mbetet e mbyllur në sirtarin e Lindita Nikollës.
Pala e Bashës pretendoi për falsifikim, por gjykata vlerësoi se këto akte nuk mund të gjykohen në këtë gjyq, por në gjyqin tjetër, pas kërkesës së 7 deputetëve që kërkuan mosnjohjen e Bashës si kryetar pasi ishte dorëhequr.
Në këtë proces palë ishin Rithemelimi i drejtuar nga Sali Berisha, grupimi i Gazment Bardhit dhe ai i Lulzim Bashës.
Avokati i Rithemelimit kërkon që gjykata të mos e regjistrojë statutin e ri të kryedemokratit Lulzim Basha, pa u shqyrtuar çështja në themel.
Avokatët e PD zyrtare kërkuan më herët në gjykatë njohjen e vendimeve të dala nga Kuvendi i 2 shtatorit, ku u ndryshua Statuti dhe iu hoqën kompetencat Gazment Bardhit për drejtimin e Grupit Parlamentar.
Po në të njëjtën kohë, avokatët përfaqësues të grupimit të Bardhit dhe ata të Rithemelimit kërkuan pezullimin e kësaj çështje deri në marrjen e një vendimi të Gjykatës së Lartë për padinë e bërë në marsin e këtij viti.
Në 25 tetor, datë kur u zhvillua një nga seancat, përfaqësuesit ligjor të PD-së Indrit Sefa dhe Rezart Kthupi, kërkuan që Gazment Bardhit të sjellë dokumentacionin që vërteton mbledhjen e Këshillit Kombëtar të datës 28 korrik 2023, e cila është zhvilluar online, ku u kërkua mosnjohja e Bashës si kryetar i PD.
Avokatët e PD-së zyrtare u shprehën se shkresa mbi të cilën prodhohet kërkesa ndaj Gjykatës mund të jetë në kushtet e falsifikimit të dokumenteve.
Ndërkohë Gjykata ka rrëzuar kërkesën e Sefës dhe Kthupit për të detyruar palën tjetër që të sjellin dokumentacionin e plotë në procesin gjyqësor.
Sakaq Sefa kërkoi përjashtimin e e gjykatësit Niko Rapi duke theksuar se po tregohet i anshëm në këtë proces.
“Po tregoheni tërësisht i anshëm në këtë proces”-tha ai në datën 25 tetor. Kjo bëri që seanca të shtyhej për në 13 nëntor, pra ditën e sotme.
Çfarë deklaruan seancën e kaluar avokatët e PD:
Indrit Sefa: Ne kemi dyshime të arsyeshme se në dosje mungon dokumentacioni i nevojshëm për të legjitimuar procesin. Ne na rezulton që mos të jetë mbledhur Këshilli Kombëtar, pasi nuk mbështetet askund në legjislacion. Ne kemi dyshime të arsyeshme se kjo mbledhje nuk ekziston dhe jemi ne kushtet e falsifikimit të dokumenteve. Ne i kërkojmë dokumentacionin që pala e përfshirë në proces pretendon se ka organizuar dhe mbledhur Këshillin Kombëtar.
Kthupi: Shkresa mbi të cilën prodhohet kërkesa ndaj Gjykatës mund të jetë në kushtet e falsifikimit të dokumenteve. Nëse nuk prodhohet i gjithë dokumentacioni me të cilin është marrë vendi, i Këshillit, do të ishim në kushtet e paragjykimit të një procesi. Nuk mund të bëhet një vendimarrje “Prima façia”.
Sefa: Duam të administrohen provat për të provuar ligjshmërinë e mbledhjes se Këshillit Kombëtar. Kërkojmë nga kjo gjykatë, që pala e tretë të vendos në dispozicion të gjithë dokumentacionin e plotë. Nuk kërkojmë vlerësimin për vlefshmërinë e dokumenteve, por thjesht të na vihen në dispozicion.
Discussion about this post