Shqipëria do të përballet sonte prej orës 15:00 me Finlandën, për llogari të Ligës C në Ligën e Kombeve. Si kryesuese e grupit, Kombëtarja ka shansin të niset në fushë me moralin e lartë dhe sfidën për të befasuar një kundërshtar me të cilin nuk e njeh fitoren prej 46 vitesh.
Për këtë duel, kuqezinjtë do të jenë në “duart” e një irlandezi. Fjala është për Robert Hennessy, i caktuar nga UEFA për të vendosur drejtësi në ndeshjen që do të luhet në Helsinki. Ai do të ndihmohet nga dy asistentët e tij Dermot Broughton dhe Emmett Dynan, ndërsa arbitër i katërt është emëruar Aaron O’Dowd. Edhe këta të fundit po nga Irlanda.
Sa i takon sistemit VAR dhe aVAR, do të jenë skoce, respektivisht, Kevin Clancy dhe John Beaton. Po, kush është Robert Hennessy dhe çfarë standardi ndjek ai në momentin që vërshëllen për topin e parë.
Arbitri irlandez nuk shquhet për dhënie të shpeshta kartonësh të verdhë, çfarë do të thotë se ndërhyrja duhet të jetë me intensitet të lartë që të dalë nga xhepi i tij.
Prioritet për të është menaxhimi i situatave, por jo gjithmonë tolerant kur ngjarjet krijojnë tensione. Një pikë shumë e rëndësishme është që Hennessy nuk e kursen kartonin e verdhë për lojtarët që protestojnë vazhdimisht mbi vendimet e kryesorit.
Discussion about this post