Atlanta është vënë në gatishmëri maksimale për sfidën e shumëpritur mes Anglisë dhe Argjentinës, një duel që pritet të tërheqë vëmendjen e gjithë botës së futbollit.
Autoritetet lokale kanë bërë të ditur se po ndërmarrin masa të rrepta sigurie, me synimin që ndeshja të mbahet mend vetëm për spektaklin në fushën e blertë.
Në qytetin e shtetit të Georgia-s priten rreth 75 mijë tifozë me biletë, të cilët do të mbushin tribunat e “Mercedes-Benz Stadium” për të ndjekur përballjen që do të përcaktojë finalisten e dytë të turneut.
Historia e dueleve mes Anglisë dhe Argjentinës në Botëror ka qenë gjithmonë e mbushur me rivalitet, polemika dhe emocione të forta.
Në disa raste, tensionet në fushë janë reflektuar edhe jashtë saj, duke sjellë përplasje mes tifozëve të dy kombëtareve.
Pikërisht për këtë arsye, policia e Atlanta-s ka hartuar një plan të detajuar sigurie për të mbajtur të ndara tifozëritë dhe për të parandaluar çdo incident të mundshëm.
Autoritetet kanë shtuar praninë e forcave të rendit në zonat kryesore të qytetit dhe rreth stadiumit, duke synuar që atmosfera festive të mos prishet nga asnjë akt dhune.
Dy kombëtaret nuk janë përballur mes tyre prej gati dy dekadash, çka e bën këtë sfidë edhe më të veçantë.
Tashmë mbetet të shihet nëse vëmendja do të mbetet vetëm te futbolli, ashtu siç shpresojnë organizatorët dhe policia lokale.
Discussion about this post