Tutori dhe dy meshkuj që akuzohen se ushtronin prostitucion janë arrestuar nga policia në Tiranë.
Policia e Tiranës njofton se ka finalizuar operacionin policor të koduar “ET-1”, për goditjen e një rrjeti prostitucioni. Operacioni u zhvillua nga Seksioni për Hetimin e Trafiqeve në DVP Tiranë, në bashkëpunim me Komisariatin e Policisë Nr. 3.
Si pasojë e këtij operacioni, është vënë në pranga një shtetas nga Venezuela, organizator i rrjetit të prostitucionit, në Tiranë. Po ashtu, u vu në pranga edhe një shtetas tjetër i huaj dhe u procedua penalisht një 19-vjeçar, që sipas bluve kishin ardhur në Shqipëri, për të ushtruar prostitucion.
“DVP Tiranë, në bashkëpunim me Komisariatin e Policisë Nr. 3, në vijim të punës për goditjen e paligjshmërive, organizuan dhe finalizuan operacionin policor të koduar “ET-1”, si rezultat i të cilit u bë arrestimi i shtetasve G. J., 29 vjeç, dhe D. C., 31 vjeç, dhe u procedua në gjendje të lirë shtetasi A. S., 19 vjeç, të tre banues provizorë në Tiranë.
Nga veprimet hetimore ka rezultuar se shtetasi G. J. shfrytëzonte për prostitucion, dy shtetasit e tjerë, të cilët kishin ardhur nga vende të ndryshme, në Shqipëri, ishin akomoduar në një banesë me qira, në rrugën “Kongresi i Tiranës”, dhe nëpërmjet një faqeje në internet, krijonin kontakte me njerëz të ndryshëm, për të ushtruar prostitucionin, kundrejt pagesave 150-300 euro.
Vijon puna për identifikimin e shtetasve të tjerë të përfshirë në këtë veprimtari kriminale. Materialet procedurale i kaluan Prokurorisë”, thuhet në njoftimin e Policisë së Tiranës.
Discussion about this post