Goditet mafia shqiptare në Belgjikë, 12 të arrestuar

Forca të shumta policore belge u angazhuan sot në mëngjes në një mega-operacion kundër mafies shqiptare në Antverpë.

Sipas medieve vendase, më shumë se 275 oficerë policie u angazhuan në këtë operacion.

12 të dyshuar janë arrestuar, ndërsa u bastisën të paktën 19 adresa.

Drejtuesit e policisë thanë se hetimi kishte nisur në vitin 2022 dhe ishte kompleks dhe në një shkallë të gjerë.

“Qëllimi ishte ambienti kriminal shqiptar,” tha prokuroria.

Fillimisht hetimi ishte fokusuar te armët e zjarrit dhe eksplozivët. Por më pas rrjeti u zgjerua pasi gjatë hetimeve u zbulua edhe një komponent i rëndësishëm i trafikut të drogës.

Mendohet se një 51-vjeçar ishte koordinatori i organizatës.

Ndërkohë një 55-vjeçar mendohet se është përgjegjës për importin, eksportin dhe tregtinë e narkotikëve.

Këtë herë prokuroria thotë se hetimi ishte i vështirë për shkak se të dyshuarit ishin shumë të kujdesshëm me komunikimet e tyre. Ata shmangnin telefonat dhe preferonin të takoheshin personalisht. Pika kryesore e takimeve ishte një kafene në Seefhoek.

Kujtojmë se zbërthimi i telefonave të koduar në Belgjikë ka sjellë arrestimin e dhjetëra kriminelëve me origjinë shqiptare.