Avokati dhe akademiku Sokol Mëngjesi është dhunuar mëngjesin e kësaj të Mërkure në kryeqytetet. Ngjarja ka ndodhur rreth orës 08:50, në zonën e ish-Bllokut. Sipas policisë, Mëngjesi është goditur nga persona të paidentifikuar dhe është dërguar në spitalin e Traumës për të marrë ndihmë mjekësore.
Gjendja e tij shëndetësore është e stabilizuar, ndërsa një hetim ka nisur për identifikimin dhe kapjen e autorëve, shtuan të njëjtat burime. Ndërkohë, Argita Malltezi, një nga koleget e avokatit në Fakultetin e Drejtësisë e cila e vizitoi në spital, tha se ai është në reanimacion. Ndërsa burime spitalore konfirmuan më pas se Mëngjesi është futur në intubim.
Burime pranë bluve thanë se dyshohet që avokati është goditur me grushte e sende të forta në kokë e trup dhe tre persona dyshohet se kanë marrë pjesë në dhunimin e tij. Avokati është sulmuar teksa ishte duke ecur në rrugë i vetëm, pasi shoqëroi të birin në kopësht. Blutë kanë sekuestruar kamerat e sigurisë në zonë si dhe kanë marrë në pyetje dëshmitarë. Burime pranë grupi hetimor thanë se nga këqyrja e kamerave duken tre autorët të cilët janë të veshur me të zeza dhe me kapele në kokë.
Një dëshmitare u shpreh për mediat se e pa avokatin të shtrirë në tokë pranë kopështit, pa ndjenja.
Pas përmirësimit të gjendjes shëndetësore, pritet të merret dhe dëshmia e avokatit. Sipas burimeve nga “Truama”, Mëngjesi ka fraktura në kokë.
Dhunimi i avokatit për shkak të detyrës është nga pistat që po hetohet nga grupi hetimor, megjithatë po verifikohen edhe konfliktet e mundshme që ai mund të ketë.
Mëngjesi është pjesë trupës pedagogjike të Fakultetit të Drejtësisë në Universitetin e Tiranës dhe si mbron interesat e ish-kryeministrit Sali Berisha në procesin gjyqësor që po zhvillohet në Gjykatën e Posaçme për çështjen “Partizani”.
PD: Urdhëruesi është Rama
Për Partinë Demokratike, është pikërisht detyra e Mëngjesit si përfaqësues ligjor i kryedemokratit Berisha, që ka sjellë sulmin ndaj tij. Sipas PD-së, urdhëruesi i dhunës ndaj avokatit është kryeministri Edi Rama.
“Ky është një akt kriminal dhe hakmarrje e verbër, primitive e Edi Ramës ndaj profesor Sokol Mëngjesit, sepse ai së bashku me kolegët e tij, faktuan para shqiptarëve me prova dhe dokumente zyrtare të pakundërshtueshme, se procesi gjyqësor kundër kryetarit të Partisë Demokratike është një proces kryekëput politik i bazuar ne një piramidë mashtrimi, siç është çështja e Klubit Sportiv Partizani”, tha pas ngjarjes zëdhënësja e PD-së Floriana Garo, në një deklaratë nga selia blu.
Akuzave të PD iu përgjigj ministri i Brendshëm, Taulant Balla, i cili tha se “shpreh keqardhjen që nga kati i 8 hidhet edhe në këtë rast një kazan me helm për publikun, me qëllimi vetëviktimizimin politik të një të korruptuari madhor”. Ministri po ashtu konfirmoi identifikimin e një prej autorëve të dyshuar të sulmit ndaj avokatit.
Lidhur me rastin reaguan edhe deputetë si dhe Dhoma e Avokatisë e Universiteti i Tiranës, që kërkuan zbardhjen sa më shpejt të ngjarjes nga autoritetet ligjzbatuese.
Lexi edhe:
“Ishte pa ndjenja”, dëshmitarja rrëfen për sulmin ndaj avokatit Sokol Mëngjesi
Discussion about this post