Autoritetet italiane kanë goditur një grup të strukturuar kriminal me aktivitet në trafikun e kokainës në rajonin e Umbrias dhe më gjerë. Me urdhër të Gjykatës për Hetimet Paraprake pranë Gjykatës së Perugias, janë zbatuar masa parandaluese ndaj shtatë personave, të dyshuar si pjesë e këtij grupi kriminal.
Operacioni i sotëm i Guarda di Finanza, ka ekzekutuar 3 masa arresti me burg, 1 nën arrest shtëpie, ndërsa 3 të tjerë janë shpallur në kërkim.
Sipas Prokurorisë së Perugias, 5 nga të dyshuarit janë shtetas me origjinë shqiptare, një është italian dhe një me origjinë rumune. Grupi i narkotrafikantëve drejtohetj nga një shtetas shqiptar, i cili nga Shqipëria koordinonte furnizimin dhe shpërndarjen e sasive të mëdha të kokainës, kryesisht në zonën e Umbrias.
Hetimet kanë zbuluar se qendra vendimmarrëse dhe operative e tyre ishte qyteti i Folignos, ku veprimtaria kriminale mbështetej edhe nga një aktivitet tregtar në sektorin e restoranteve, i cili dyshohet se përdorej si mbulesë për riciklimin e të ardhurave nga trafiku i drogës. Në këtë aktivitet ishte e përfshirë edhe bashkëshortja e kreut të dyshuar të grupit.
Hetimet, të nisura në vitin 2024 nga Njësia e Policisë Ekonomiko-Financiare (G.I.C.O.), janë zhvilluar përmes përgjimeve telefonike dhe ambientale, sistemeve të lokalizimit satelitor, si dhe vëzhgimeve dhe ndjekjeve në terren. Grupi përdorte metoda të avancuara për të shmangur kontrollet, përfshirë kriptotelefonë, aplikacione komunikimi të koduara, pajisje kundër survejimit dhe automjete me ndarje të fshehta për transportin e drogës.
Gjatë hetimeve janë dokumentuar mbi 50 episode trafiku droge. Deri tani, autoritetet kanë sekuestruar rreth 68 kilogramë kokainë, të fshehur në ambiente tregtare dhe objekte private, si dhe dy automjete të modifikuara posaçërisht për transportin e lëndës narkotike. Një person ishte arrestuar më herët në flagrancë dhe ndodhet ende në paraburgim.
Gjykatësi për Hetimet Paraprake ka vlerësuar se provat e mbledhura tregojnë qartë ekzistencën e një strukture kriminale të qëndrueshme, të bazuar në marrëdhënie të vazhdueshme mes anëtarëve dhe të orientuar drejt furnizimit dhe shpërndarjes sistematike të lëndëve narkotike.
Hetimet vijojnë për kapjen e personave ende në kërkim dhe për identifikimin e lidhjeve të tjera të mundshme të rrjetit në territorin italian.
Discussion about this post