Është caktuar data për shqyrtimin e kërkesës së Gert Shehut në Gjykatën e Apelit të Tiranës, pasi kërkon të lirohet nga qelia.
Seanca do të zhvillohet të mërkurën, 28 dhjetor në orën 12:30, ndërsa avokatët e Shehut kanë kërkuar ndryshim mase nga arrest në burg, në arrest shtëpie ose shtrim i detyruar në spitalin psikiatrik. Gert Shehu ndodhet në arrest për akuzat e goditjes për shkak të detyrës dhe plagosjes së lehtë me dashje, për ngjarjen e ndodhur më 6 dhjetor ndaj Sali Berishës.
Prokuroria ka kërkuar që Shehu të qëndrojë në burg pa afat, me qëllim daljen e akt ekspertimit psikologjik, që do konfirmojë nëse 31-vjeçari ka apo jo probleme të shëndetit mendor, ashtu siç u pretendua nga familja.
Gerti Shehu, 31-vjeç sulmoi kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur. Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD-së.
Discussion about this post