Kryeministri i Izraelit, Benjamin Netanyahu shpalli planin e ri ndaj goditjes së armiqve të vendit, duke njoftuar se vitin e ardhshëm objektiv do të jetë boshti iranian.
“Jemi të angazhuar në një luftë në të cilën po mbizotërojmë mbi armiqtë tanë dhe duhet të shkatërrojmë boshtin iranian, dhe kemi fuqinë për ta bërë këtë.
Kjo është ajo që na pret në vitin e ardhshëm, i cili mund të jetë një vit historik për sigurinë e Izraelit”, tha Netanyahu.
Deklarata u bë gjatë një takimi me Forumin e Shtabit të Përgjithshëm të Forcave të Mbrojtjes së Izraelit (IDF), së bashku me shefin e Shtabit të IDF-së, gjenerallejtënant Eyal Zamir dhe ministrin e Mbrojtjes, Israel Katz, raporton The Times of Israel.
“Dua të përsëris se jemi të vendosur të arrijmë të gjitha objektivat tona të luftës”, shtoi ai, “jo vetëm në Gaza, jo vetëm për të përfunduar eliminimin e Hamasit, për të liruar pengjet tona dhe për të siguruar që Gaza të mos përbëjë më kërcënim për Izraelin, por edhe në fronte të tjera, për të hapur mundësi për siguri, për fitore dhe gjithashtu për paqe”.
Izraeli po vijon prej më shumë se një jave fazën e dytë të operacionit në Gaza, ku ka objektiv mposhtjen e plotë të Hamasit dhe lirimin e pengjeve.
Discussion about this post