Sot mbushen 36 vite nga goli i Diego Armando Maradonës ndaj Anglisë, në Botërorin e Meksikës që u quajt “Dora e Zotit”. Tata Broën ka shpjeguar çfarë i ndodhi legjendës argjentinase të futbollit një natë para ndeshjes së paharrueshme ndaj Anglisë, ku tregoi tërë madhështinë e tij me driblimin e të gjithë lojtarëve kundërshtarë dhe gol:
“Natën para ndeshjes ai nuk tha asnjë fjalë, asnjë. Diego hëngri darkë dhe u mbyll vetëm në dhomën e tij. Atë natë nuk dëgjoi muzikë, nuk bëri shaka, nuk bëri asgjë. Menduam se ndihej keq, e shikoja gjatë gjithë kohës, për aq sa mundja. Në orën 2 të mëngjesit doli në ballkon duke parë, mendonte. Iu afrova dhe e pyeta: Diego, a ka diçka që nuk shkon me ty? Ai thjesht më buzëqeshi dhe më tha: Çfarë po bën zgjuar, shko të flesh. Ma tha këtë me një buzëqeshje. Ditën tjetër para ndeshjes ishte i pari që na gëzoi të gjithëve. Ai na dha të gjithëve hare dhe frymë optimizmi. Duke dalë në fushë, nxori gjoksin përpara dhe shikonte lart. Nuk tha asnjë fjalë, e kishte seriozisht, vetëm vështronte anglezët. Kur mbaroi himni, u dëgjua kjo klithmë: Hajde, ej, hajde! Këta bijtë e ku…s na vranë miqtë, fqinjët. Nuk mund të humbasim! Diego ishte një njeri i përqendruar në hakmarrjen e tij. Një vit më vonë, veteranët Malvinas thanë: Ajo që bëri Diego ishte gjëja më e mirë për t’u hakmarrë për ne. Ai, me magjinë e tij, e bëri të mundur”.
“Dora e Zotit” /Luhej 36 vite më parë ndeshja mes Argjentinës dhe Anglisë, në Botërorin 1986 në Meksikë. Një ndër ndeshjet më të paharrueshme në historinë e futbollit, me një protagonist të vetëm, Diego Armando Maradonën. Brenda 5 minutave, ai shënon një gol me dorë dhe më pas, ndoshta golin më të bukur, jo vetëm të karrierës së tij futbollistike. Argjentina dhe Anglia u takuan në Qytetin e Meksikos, në ndeshjen e vlefshme për fazën çerekfinale të Botërorit. Rivaliteti mes dy skuadrave ishte i madh, edhe për shkak të një lufte ndërshtetërore për ishujt Falkland. Pjesa e parë e takimit përfundoi 0-0 dhe dy skuadrat bënë shumë kujdes të mos pësojnë.
Në stadiumin e famshëm “Azteca”, në minutën e 51-të, kapiteni argjentinas Maradona shënoi një gol me dorë. Më pas ai do ta cilësonte atë si “Dorën e Zotit” dhe Argjentina kaloi në avantazh, pavarësisht protestave të anglezëve.
Por vetëm 5 minuta më pas, ylli argjentinas dhe i ekipit të Napolit në Itali do të bënte një mrekulli në fushë. Duke shmangur 7-8 lojtarë anglezë, së bashku me portierin Shilton, në një dribling prej gjysmës së fushës argjentinase, Maradona do të shënonte një ndër golat më të bukur të historisë së futbollit. Në minutën e 81-të, goli i anglezit Geri Lineker nuk do të kishte shumë vlerë.
Discussion about this post